دۋلات يسابەكوۆ: قازاق – قۇلاقپەن قابىلدايتىن حالىق

 

مەملەكەت باسشىسى نۇرسۇلتان نازارباەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا 2025 جىلدان باستاپ لاتىن الىپبيىنە كوشۋگە كىرىسۋ قاجەتتىگىن ايتقان بولاتىن. تاۋەلسىزدىك العان جىلداردان بەرى كوتەرىلىپ كەلە جاتقان بۇل ماسەلە قازىر دە قوعام اراسىندا قىزۋ تالقىلانۋدا. وسى رەتتە جازۋشى، دراماتۋرگ، قر مەملەكەتتىك سىيلىعىنىڭ يەگەرى دۋلات يسابەكوۆتىڭ لاتىن الىپبيىنە كوشۋ پروتسەسى جونىندەگى وي-پىكىرىن بىلگەن ەدىك.

– دۋلات اعا، ەلباسى «لاتىن الىپبيىنە كوشۋدى باستايمىز» دەدى. بۇل  ماسەلەنىڭ ءبىرازدان بەرى كوتەرىلىپ جۇرگەنى ءمالىم. وسى تاقىرىپقا قاتىستى ءسىزدىڭ پىكىرىڭىزدى بىلسەك…

–  بۇل تاقىرىپقا بايلانىستى پىكىرىمدى مەملەكەت باسشىسىنىڭ الدىندا بىلدىرگەنمىن. ەرتە مە، كەش پە،  لاتىن الىپبيىنە كوشەتىنىمىز انىق بولاتىن. بىراق «ءۇيدى جىعىپ، جاڭا جايلاۋعا كوشەمىز» دەگەندە اۋى مەن باۋى كوبەيىپ كەتەدى ەكەن. باراتىن جەرىمىز قانداي، قوناتىن جەرىمىز قالاي؟ قىس قىستاۋى، جاز جايلاۋى قالاي بولادى؟ ىڭعايلى بولا ما؟ قازىر وسىنداي ساۋالداردىڭ الدىمىزدان شىعىپ تۇرعانى جاسىرىن ەمەس.

ونىڭ ۇستىنە، دىبىستاردىڭ تاڭبالانۋىنا كەلگەندە ءبىز اعىلشىننىڭ ءنورماتيۆىن قابىلداعالى وتىرمىز. مەن ءتىپتى، كەيبىر سوزدەردى وقي الماي دا قالدىم. اعىلشىندار ءبىر دىبىستى ەكى-ءۇش تاڭبامەن جازادى، ماسەلەن،  «بيزنەس» دەگەن ءسوزدى ولار «بۋيزنەس» دەپ جازادى. «بەلينە» دەپ جازىلعان ءسوزدى «بيلاين» دەپ وقيمىز.  ءبىز دە سوعان كوشىپ بارا جاتقان سياقتىمىز. وسى قاداممەن جالعاستىراتىن بولساق، ابدەن شاتاساتىن ءتۇرىمىز بار.

ءارىپتىڭ سانىن دىبىستىڭ تاڭبالانۋىمەن عانا ولشەۋىمىز كەرەك. مەيلى، 15 ءارىپ بولسىن، مەيلى 45 ءارىپ بولسىن. ال الگىندەي ۇسىنىلعان ءالىپبي بويىنشا، ءبىر دىبىستى ەكى ارىپپەن جازاتىن بولساق، قازاقتىڭ ءبىراز ءسوزىن وقۋ قيىندايدى. ال «ءى» مەن «ي» ءبىر ءارىپ بولعالى تۇر. ونى ءبىز قالاي وقيمىز؟ قازاقتىڭ ارىپتەرىن قازاقتان باسقا ەشكىم قولدانبايدى عوي. اعىلشىن ءبىزدىڭ ارىپتەرىمىزدى المايدى. سوندىقتان ءبىز سول ارىپتەردى قالدىرۋىمىز كەرەك سياقتى. نەمەسە اراب الىپبيىندەگى سەكىلدى تاڭبانىڭ ۇستىنە نوقاتتاردى قويۋ ارقىلى جازعانىمىز دۇرىس. تەلەديداردان جۇگىرتپە جول ارقىلى لاتىن قارپىمەن جازىلعان اقپاراتتاردى بايقاپ قالامىن. بىراق مەن ونىڭ ءبىر ءسوزىن دە وقىپ ۇلگەرە المايمىن.

قازىرگى الىپبيگە قاراسام، قازاق ارىپتەرىنىڭ دىبىستالۋى مەن جازىلۋى ەكى بولەك بولايىن دەپ تۇر. قايسىسى دۇرىس؟ قايسىسى بۇرىس؟  ورفوەپيا، ورفوگرافيانى بىلاي قويعاندا، ءارىپتىڭ نە ەكەنىن مەكتەپ قابىرعاسىندا وقىدىق ەمەس پە؟ ءارىپ – دىبىستاردىڭ تاڭبالانۋى. بۇل – قاتىپ قالعان تەوريا. ونى وزگەرتۋگە كەلمەيدى. وسىعان دەيىن قازاق الفاۆيتىندە 42 ءارىپ بولىپ ەدى عوي. ءبىز سونىمەن جازىپ كەلدىك. ەشكىم ەشتەڭە دەگەن جوق.

– لاتىن الىپبيىنە كوشۋدە قانداي قيىندىقتارمەن بەتپە-بەت كەلۋىمىز مۇمكىن، قالاي ويلايسىز؟

– ەندى ءوز شىعارمالارىمدى ءومىر باقي كيريلليتسامەن  جازىپ وتەتىن شىعارمىن. مەن جاڭا الىپبيگە كوشە المايمىن. مەكتەپ تابالدىرىعىن جاڭا  اتتاعان بالالار، وسكەلەڭ ۇرپاق ۇيرەنىپ شىقپاسا، مەنىڭ زامانداستارىم ءۇشىن وڭاي بولمايتىن سەكىلدى. الايدا اعىلشىننىڭ ۇندەستىگىنە قاراپ وقىعان كۇننىڭ وزىندە دە قازاقتىڭ ءسوزى تۇسىنىكسىز بولىپ، باسقاشا مانگە يە بولىپ كەتەتىندەي كورىنەدى. تۇرىكتىڭ، ءازىربايجاننىڭ سوزىنە ۇقساپ كەتە مە، قالاي؟! ايتەۋىر، قازاقتىڭ سوزدەرى قازىرگى كيريلل قارپىمەن جازىپ جۇرگەننەن باسقاشا بولىپ شىعاتىن ءتۇرى بار. بۇل – ءبىر. مەن قازىر وسىنى ۋايىم قىلا باستادىم.

ەكىنشى، لاتىن ءالىپبيى ءبىزدىڭ قوعامدى ەكىگە بولەتىن ءتۇرى بار. ويتكەنى ورىس تىلىندەگى مەكتەپتەر، جوعارى وقۋ ورىندارىنداعى ورىس بولىمدەرى كيريلل قارپىمەن قالادى. سوندا مەكتەپتى كيريللمەن بىتىرەتىندەر جانە لاتىنمەن بىتىرەتىندەر توبى قالىپتاسادى. ورىس مەكتەپتەرىندە وقيتىن بالالاردىڭ 80 پايىزى قازاق بالالارى. ءسويتىپ ەرتەڭگى كۇنى ولار مەكتەپتى بىتىرەدى. جوعارى وقۋ ورنىن ءتامامدايدى. قىزمەتكە ارالاسادى. سول كەزدە كيريلليتسامەن جازاتىن توپ، لاتىننىڭ توبى بوپ ەكىگە ءبولىنىپ، قىزمەتتە دە ءبىر-ءبىرىن تارتادى. ال لاتىن الىپبيىمەن بىتىرگەندەر وزدەرى سەكىلدىلەردى تارتا باستايدى. ءسويتىپ، باياعى كەلە جاتقان ءبىر توپ ەكىگە بولىنەدى. وسى ۇلكەن قاۋىپ بولادى. قازىر ونى بايقاماي تۇرمىز. ونسىز دا ءبولىنىپ-جارىلىپ جۇرەتىن قازاق ەدىك. ەندى لاتىن جانە كيريللمەن وقىعاندار توبى بوپ تاعى بولىنەتىن بولدىق.

مەنىڭ ۇسىنىسىم مىناداي، وتكەندە الماتى قالالىق اكىمدىگىندە وتكەن جيىندا دا وسىلاي ايتقانمىن. پرەزيدەنتتىڭ الدىندا دا كەلىسكەن سياقتى ەدىك. ەگەر دە لاتىن الىپبيىنە كوشەتىن بولساق، قازاقستان جاپپاي كوشۋى ءتيىس. ورىسى دا، قازاعى دا، ۇيعىرى دا، شەشەنى دە. قازاقستاننىڭ تەرريتورياسىندا ءالىپبي ءبىرتۇتاس بولۋ كەرەك. ەگەر ولاي جاسامايتىن بولساق، بىزگە ۇلكەن قيىندىق تۋعىزادى. ءازىربايجاندار مەن وزبەكتەر باياعىدا ءوتىپ كەتكەن دەپ ايتامىز، بىراق ولار ءالى سول قيىندىقتان ارىلا الماي كەلەدى.

– «لاتىن الىپبيىنە كوشسەك، بۇرىنعى جازىلعان ەڭبەكتەردى اۋدارۋعا كوپ ۋاقىت جانە قاراجات كەتەدى» دەيتىندەردىڭ قاتارى كوپ. جاڭا الىپبيگە اۋىسامىز دەپ قۇندى شىعارمالارىمىزدى جوعالتىپ الامىز دەپ ۇرەيلەنەتىندەر دە از ەمەس.

– ءبىزدىڭ قانشاما شىعارمالارىمىز بار. ونىڭ ءبارىن ەلەكتروندى تۇردە لاتىن قارپىنە اۋدارعاندا قاتە كەتپەسىنە كىم كەپىل؟! تەك كوركەم شىعارما، فيلوسوفيالىق، تانىمدىق دۇنيەلەر عانا ەمەس، تاۋ-تاۋ بوپ ءۇيىلىپ جاتقان تاريحىمىز بار. ماسەلەن گازەتتەردىڭ ءارحيۆىن قاراۋ كەرەك بولادى. عالىمدار مۇراعاتتان وزدەرىنە كەرەكتى ماتەريالدارىن ىزدەيدى. بەلگىلى ءبىر كەزەڭدە جازىلعان ماقالالاردى قاراۋ كەرەك بولسا شە؟ 10 جىلدىق گازەتتىڭ تىگىندىسىن الىپ قارايتىن عالىمدار ءۇشىن بۇل ۇلكەن قيىندىق تۋعىزايىن دەپ وتىر. لاتىن قارپىمەن بىتىرگەندەر كيريلليتسامەن جازىلعاندى وقي الماۋى مۇمكىن. ءسويتىپ، ءوزىمىز وسىنىڭ ءبارىن ءشات-شالەكەي قىلىپ الامىز با دەپ قورقامىن.

قازىر كوركەم شىعارمالار ونسىز دا وقىلمايدى. ەندى ءارىپ قيىندىعى تۋىنداپ، شىعارمالاردىڭ ءبارىن لاتىن  الىپبيىنە كوشىرگەندە ءسوزدىڭ ءمانى دە، ماعىناسى دا، قۇنارلىلىعى دا، قۇندىلىعى دا، اۋەزدىلىگى دە جوعالادى. ماسەلەن، ءوزىمنىڭ شىعارمالارىمدى وقىپ وتىرمىن. كەرەمەت ءبىر سوزدەر بار دەپ ويلايمىن شىعارمالارىمنىڭ ىشىندە. سول سوزدەردى لاتىن الىپبيىنە سالىپ كورىپ ەدىم، بۇرىنعىداي ءمانى جوق سياقتى. جۇرت اراسىندا تاراپ كەتكەن «قارا قارعانىڭ ميى قاينايدى»، «شاڭقاي ءتۇس» دەگەن سوزدەردى جازىپ كورىپ ەدىم. الگىندەي ماعىنا بەرمەيتىن ءتارىزدى. اۋەزدىلىگىنەن ايىرىلىپ، ءسوز ماعىناسىنىڭ قۇندىلىعى جويىلىپ كەتكەندەي. تاعى دا وسىنداي سوزدەر كوپ. مۇحتار اۋەزوۆتىڭ رومانىنان دا ءۇزىندى الىپ، لاتىن الىپبيىنە سالىپ كورگەن ەدىم، ويپىرماي، سوزدەردى ءوزىم تۇسىنە المادىم. الدە ءبىزدىڭ قۇلاعىمىز ۇيرەنبەي جاتىر ما؟

ەرتەڭ بولاشاعىمىز ب ۇلىڭعىر بولىپ قالا ما ەكەن دەپ تە قورقامىن. ساۋاتسىزدار كوبەيىپ كەتە مە دەپ سەسكەنەمىن. كيريلل قارپىمەن جاساعان رۋحاني قازىنامىز وزگە الفاۆيتتەردەن گورى بىرنەشە ەسە كوپ قوي. اراب ارپىمەن جازىپ كوردىك، وندا دا ساناۋلى ۋاقىت قانا. ول كەزدە كوركەم شىعارمالار از ەدى. ون شاقتى عانا قالامگەر بولاتىن. عالىمدار دا كوپ شىقپادى. ال قازىر قانشاما دوكتور، قانشاما عىلىم كانديداتتارى بار. ولاردىڭ ەڭبەكتەرىن قايتەمىز؟ كوبىسى ورىس تىلىندە ماسكەۋدە قورعاپ كەلگەندەر. مۇنداي جاعدايدا قالاي ارەكەت ەتەمىز؟ وسىنداي قاۋىپتىڭ ءبارىن كوشپەي تۇرىپ ويلانىپ الساق دۇرىس بولار ەدى. قازاقتا «سەبەپسىز قونىس اۋىستىرما، سەبەپسىز ات اۋىستىرما» دەگەن ءسوز بار.

قازاق ءتىلى پوەتيكالىق تىلدەردىڭ ءبىرى عوي. ال قازاق قۇلاقپەن قابىلدايتىن حالىق. جەكە-جەكە سوزدەردى قابىلدامايدى. باياعىدا شىڭعىس ايتماتوۆتىڭ «اق كەمەسىن» اۋدارعاندا، «اق كەمە» دەگەن ءسوز بىرازعا دەيىن ءبىزدىڭ قۇلاعىمىزعا سىڭبەي قويعان. وبرازدى تۇردە «شاڭقان كەمە» دەپ اتايمىز با دەگەن دە وي بولدى. قازىر دە سول سياقتى ءبىراز قيىندىقتار تۋاتىن ءتۇرى بار. مۇنىڭ ءبارى العاشقى قيىندىقتار. ال ەرتەڭ جاڭا الىپبيگە كوشكەن كەزدە كورەمىز. جۇرتقا بارعاندا اناۋ جەتپەيدى، مىناۋ جەتپەيدى. بىراق ول كەزدە كەش بولادى. قايتادان بۇرىنعى جۇرتقا كوشىپ بارا المايمىز.

ودان نەسىنە قاشقانىمىزدى قايدام، احمەت بايتۇرسىنوۆتىڭ باياعىدا بەكىتىپ بەرگەن ءالفاۆيتى بار ەدى عوي. مەنىڭ ۇيىمدە ءالى جۋرنالدار تۇر. سونداعى شىعارمالاردى وقىپ جاتىرمىن. وڭاي وقىلادى. جەڭىل قابىلدانادى. ال مىنا جەردە  ەلدەر شاتاسىپ كەتتى. ءبىر ءارىپتى ەكى-ءۇش تاڭبامەن جازۋ كەرەك ەكەن. «ءا» دەگەندى «ا» جانە «ە» ارىپتەرىن قوسىپ، كادىمگى دىبىستالۋدىڭ اعىلشىنشا وقىلۋى بولماق. اعىلشىندارعا جۇرت كۇلمەيتىن بە ەدى؟! «ليۆەرپۋل» دەپ جازادى دا، «مانچەستەر» دەپ وقيتىندىعى ءۇشىن. سول سياقتى بىزدە دە سوزدەردىڭ جازىلۋى ءبىر باسقا، وقىلۋى ءبىر باسقا بولعالى تۇر. وسىلاي شاتاسىپ، وعان ۇيرەنەمىز دەگەنشە ۇزاق ۋاقىت ءوتىپ كەتەتىن ءتۇرى بار. مەن قازىر ويلانىپ قالدىم. لاتىن الىپبيىنە كوشۋ كەرەك پە؟ الدە كەرەك ەمەس پە؟ شىنىندا، ويلاناتىن جاعداي. مەنىڭ بۇل سوزىمە قاراپ، ەل-جۇرت «يسابەكوۆ بوداندىقتان قاشقىسى كەلمەيدى» دەپ ويلاۋى مۇمكىن. باياعى سىنا جازۋىنا وتەمىز بە، ارميان جازۋىنا اۋىسساق تا، ءتىپتى، قىتاي جازۋىنا كوشىپ كەتسەك تە، قانداي جازۋعا كوشىپ كەتەيىك، ءبىز ىرگەمىزدە وتىرعان ورىستىڭ وكتەمدىگىنەن قۇتىلىپ كەتە المايتىن سياقتىمىز. ويتكەنى ءبىزدىڭ ەلىمىز قىتاي مەنەن ورىستىڭ قاق ورتاسىندا ورنالاسقان. ىرگەمىز 8 مىڭ شاقىرىم. ونى ءبىز قالاي توقتاتامىز؟

اۋەلدە، لاتىنعا كوشەمىز دەگەندە الاقايلاپ، قۋانىپ قالىپ ەدىم. كوشسەك، كوشكەنىمىز دۇرىس بولادى دەگەنمىن. ال ەندى كوشەمىز دەگەندە ەسكى جۇرتتى قيماي، بارىپ قوناتىن جەردى بىلمەي، ويلانىپ وتىرمىز. ءۇيدى جىعايىق پا، جىقپايىق پا؟ جىققاندا نە بولامىز؟ كوشكەندە ادام مىندەتتى تۇردە ءبىر نارسەنى جوعالتادى. جۇرتىڭدا كىشكەنتاي ۇلتاراعىڭ قالسا دا قيمايسىڭ. وسى تۇرعىدان كەلگەندە، ءالفاۆيتىمىزدى بىرىزگە ءتۇسىرىپ الماي، لاتىن الىپبيىنە كوشۋ قيىن سياقتى.

– لاتىن الىپبيىنە اۋىسۋ ارقىلى قازاق ءتىلىنىڭ مارتەبەسىن ارتتىرامىز دەپ جۇرگەندە، الگىندەي جاعدايلار ورىسشا وقيتىن بالالاردىڭ سانىن ارتتىرىپ جىبەرمەي مە؟

– قازىردىڭ وزىندە سولاي. قىزىم مەكتەپكە دەيىنگى بالالاردى وقىتاتىن ورتالىق اشقان. بالالاردى مەكتەپكە دايىندايدى. قازىر سول ورتالىققا قازاق توبىنا ەكى-اق بالا كەلىپتى. قالعانىنىڭ ءبارى ورىس توبىنا قابىلدانۋدا. نەگە دەيسىز عوي؟ اتا-انالاردىڭ ايتۋىنشا، ورىسشا باعدارلاما جەڭىل، بالالاردىڭ قابىلداۋىنا وڭاي. «ال قازاقشادا ءبارى كۇردەلى، قازاقتار بالالارىن بىردەن دانىشپان قىلىپ تاربيەلەگىسى كەلەدى. وقۋلىقتارىنىڭ دا تىلدەرى وتە قيىن. ونى جاس بالالار تۇگىلى ءبىز تۇسىنبەيمىز. ءبىز تۇسىنبەيتىن سويلەمدەر بار وقۋلىقتارىندا. سوندىقتان ورىس تىلىندەگى باعدارلامالاردى بالالار وڭاي قابىلدايدى» دەيدى اتا-انالار. ءالى كۇنگە دەيىن بالالاردىڭ قابىلداۋىنا سايكەس باعدارلاما جاساي الماي جاتىرمىز. سوسىن ءبارى ورىس توپتارىنا بەرىپ جاتىر.

«قازاق تىلىندە وقىسا، سول ەلدەن تىس جەردە ءومىر سۇرە المايدى عوي» دەگەن قاۋىپ تە بار كەيبىرەۋلەردە. رەسەي ىرگەمىزدە تۇر، وعان بارماي تۇرا المايدى. تاۋەلسىزدىك الدىق دەگەنىمىزبەن، وداقتاس رەسپۋبليكالاردىڭ كوبى ورىسشا سويلەيدى. ءبارىبىر ورىس تىلىندە سويلەسىپ، حابار الىساتىندار كوپ.

احمەت بايتۇرسىنوۆتىڭ جاساپ بەرگەن الىپبيىنەن قاشپاي، سونى قابىلداۋىمىز كەرەك. ونى قيىنداتۋدىڭ قاجەتى جوق. قازىر ءبارىن قولدان قيىنداتىپ وتىرمىز. ۇسىنىلعان ءالىپبيدى قولدايتىندار بار. ولار وزدەرىنىڭ بەيىمدەلۋ جاعىنان بىزدەن الدا ءجۇر مە، بىلمەيمىن. مەن دە وسى بەيىمدەلۋگە دايىن-اق ەدىم. الگىلەردى كورگەننەن كەيىن توقتاپ قالدىم. بۇل ەرتەڭ قالاي بولادى؟ قازاق ءتىلىنىڭ ءمانىن ونسىز دا جوعالتىپ جاتقان كەزدە، لاتىن الىپبيىنە كوشسەك، مۇلدەم ايىرىلىپ قالماساق بولعانى.

ەڭ باستىسى، قازاقستان لاتىن الىپبيىنە اۋىساتىن بولسا، ءبارىمىز بىرگە ءوتۋىمىز كەرەك. ءبارىمىز بىردەي اۋىسپاساق، قاراپ وتىرىپ جاستارىمىزدى ەكى توپقا ءبولىپ الامىز. بولاشاق سول جاستاردىڭ قولىندا. سوندا اركىم ءوزىنىڭ توبىن تارتىپ، ءبولىنىپ كەتە مە دەپ وتىرمىن. كيريلليتسامەن بىتىرگەندەر وزدەرىنىڭ كەرەمەت ءبىر اقىلدى، ءبىلىمدى جاستارىن تارتىپ، لاتىن الىپبيىمەن وقىعانداردى وزدەرىنشە دامىماعان، جەتىلمەگەن ۇرپاق دەپ ساناپ، ءبىر-ءبىرىنىڭ كەۋدەسىنەن يتەرىپ جۇرە مە دەپ قورقامىن.

جارايدى، كوپپەن كورگەن ۇلى توي. بىراق ءبىز وسى كيريلل قارپىمەن جۇمىسىمىزدى جالعاستىرامىز. 30-40 جاستاعىلاردىڭ ءوزى كيريلليتسامەن جازىپ وتەدى. مىسالى، ءابدىلدا تاجىباەۆ ءومىر بويى اراب ارىپتەرىمەن جازىپ ءوتتى ەمەس پە؟ كيريلل قارپىنە كونە المادى. بارلىق شىعارمالارىن اراب ارىپتەرىمەن جازىپ، ونى ماشينيستكالارى قايتا كيريلليتسامەن باسىپ شىقتى. ءبىز دە تۋرا سولاي كۇن كەشەيىن دەپ تۇرمىز. ءبىر وتباسىنىڭ ءوزى بىرنەشە توپقا بولىنگەلى وتىر. ءبىر بالا لاتىن الىپبيىمەن، ءبىر بالا كيريلليتسامەن ءبىلىم العان. ال ولار قالاي سويلەسەدى، قالاي وقيدى ءبىر-ءبىرىنىڭ جازعانىن. ءسويتىپ، وتباسىنىڭ وزىندە تۇسىنىسپەۋشىلىك پايدا بولۋى مۇمكىن.

وزبەكتەر، ءازىربايجاندار ءوتىپ كەتتى دەپ اتىمىزدى قامشىلاعانىمىزبەن، ولاردىڭ قازىرگى جاعدايىن كورىپ ءجۇرمىز. جىك-جىككە ءبولىنىپ، بىرنەشە رەت الفاۆيتتەرىن قايتا قارادى. ءبىز دە ءسويتىپ جۇرمەسەك جارار ەدى. بىراق ولاردا ءبىز سياقتى ارىپتەر كوپ ەمەس قوي. ال بىزدە سپەتسيفيكالىق ارىپتەر كوپ. ولاردىڭ ايتىلۋى دا قيىن. مەن قازىر اكادەميادا ساباق بەرەمىن. «ڭ» دەگەن ءارىپتى ايتا المايتىندار بار. قازاقى وتباسىندا وسكەن بالالار دا ايتا المايدى. الگى ارىپتەردىڭ لاتىنعا اۋىسۋى قيىنداۋ. قازىردىڭ وزىندە قازاق ءتىلىن ۇيرەتە الماي جاتىرمىز. ال لاتىنعا كوشكەندە بالالار تىپتەن بەتتەمەي قالۋى مۇمكىن. ءسويتىپ ءجۇرىپ ءتىلىمىزدى ءبۇلدىرىپ الماساق بولعانى. سوندىقتان تاعى ءبىر ويلانۋ كەرەك سەكىلدى. بىراق قاشانعى ويلانا بەرمەكپىز؟!

– وي-پىكىرىڭىز ءۇشىن راحمەت!

 

سۇحباتتاسقان

اسەل انۋاربەك

ۇقساس جاڭالىقتار

Back to top button