رەسەيلىك بلوگەردىڭ جازباسىنان كەيىن قاراعاندىلىق پوليتسەيلەر جازالاندى

رەسەيلىك بلوگەردىڭ قازاقستاندىق جول پوليتسياسى قىزمەتكەرلەرى تۋرالى جاريالانىمىنان كەيىن قىزمەتتىك تەكسەرۋ جۇرگىزىلدى. بۇل تۋرالى قر ءىىم اكىمشىلىك پوليتسيا كوميتەتىنىڭ ءباسپاسوز حاتشىسى يرينا لۋكيانينا-كوستەرەۆا حابارلادى، دەپ جازادى sputniknews.kz

«رەسەيلىك بلوگەر ەۆگەني ءزولوتۋحيننىڭ سىني جازباسىنان كەيىن قاراعاندى وبلىسى ءىىد جول — پاترۋلدىك پوليتسيا قىزمەتكەرلەرىنىڭ تاراپىنا تەكسەرۋ جۇرگىزىلدى»، — دەپ جازدى لۋكيانينا-كوستەرەۆا ءوزىنىڭ Facebook پاراقشاسىندا.

ول: تەكسەرۋ قورىتىندىسى بويىنشا قىزمەتتىك ەرەجە تالاپتارىن بۇزۋ ارەكەتتەرى ءۇشىن جازبادا كورسەتىلگەن جول-پاترۋلدىك پوليتسيا قىزمەتكەرلەرى جانە ولاردىڭ كومانديرلەرى تارتىپتىك جاۋاپكەرشىلىككە تارتىلدى، دەپ جازعان.
وعان قوسا، كولىك قۇرالىن توقتاتۋ قر «جول قوزعالىسى تۋرالى» زاڭىنىڭ تالاپتارىنا سايكەس جۇزەگە اسقانى بەلگىلى بولدى. كولىكتى توقتاتۋ سەبەپتەرىنىڭ ءبىرى جەدەل-پروفيلاكتيكالىق شارالاردى جۇرگىزۋ بارىسىندا جۇرگىزۋشىنىڭ قۇجاتتارىن تەكسەرۋ بولىپ تابىلادى. ءباسپاسوز حاتشىسىنىڭ ايتۋىنشا، رەسپۋبليكا كولەمىندە 12-16 قىركۇيەك ارالىعىندا «قاۋىپسىز جول» دەپ اتالاتىن جەدەل-پروفيلاكتيكالىق ءىس-شارالار جۇرگىزىلگەن.

 

ۇقساس جاڭالىقتار

Back to top button