"ەير استانا": جانارماي تاپشىلىعى تۋىنداي باستادى

«ەير استانا»: جانارماي تاپشىلىعى تۋىنداي باستادى. قازاقستاندا تۇراقتى اۋە قاتىناسىنا رەسەيدەن اۆياكەروسين جەتكىزۋدىڭ توقتاۋى ىقتيمالدىعىنا جانە شىمكەنت مۇناي وڭدەۋ زاۋىتىندا جوسپارلى جوندەۋ جۇرگىزىلەتىنىنە بايلانىستى توقتاپ قالۋ قاۋپى ءتونىپ تۇر دەپ حابارلادى «ەير استانا» اۋە كومپانياسى.

كومپانيا مالىمەتىنە قاراعاندا، قازاقستان اۆياكەروسيندى نەگىزىنەن رەسەيلىك «گازپرومنەفت»، «روسنەفت»، «لۋكويل» جانە «تاتنەفت» كومپانيالارىنان ساتىپ الادى. بۇل كومپانيالاردان يمپورتتالاتىن اۆياكەروسين كولەمى 2016 جىلعى ايىنا ورتاشا ەسەپپەن العانداعى 44 مىڭ توننادان 2017 جىلى ايىنا 15 مىڭ تونناعا دەيىن ازايعان.

اۋە كومپانياسىنىڭ مالىمدەۋىنشە، بۇل كومپانيالار «رەسەي نارىعىندا سۇرانىستىڭ جوعارى بولۋىنا بايلانىستى» الداعى ايلاردا اۆياكەروسين ساتاتىنىن ءالى راستاماعان. «ەير استانا» «گازپرومنەفت» بۇعان دەيىن جانارماي ەكسپورتى 2018 جىلدىڭ مامىر ايىنان ەرتە قايتا جالعاستىرمايتىنىن ەسكەرتكەنىن ايتادى. 2017 جىلى ازاماتتىق اۆياتسيانىڭ اۆياكەروسينگە سۇرانىسى 800 مىڭ توننا بولعان، ونىڭ تەك 241 مىڭ تونناسىن شىمكەنت مۇناي وڭدەۋ زاۋىتى قامتاماسىز ەتكەن.

بۇعان دەيىن قازاقستانداعى اۆياكەروسيندى تۇراقتى شىعاراتىن جالعىز زاۋىت – شىمكەنت مۇناي وڭدەۋ زاۋىتى جوسپارلى جوندەۋ جۇمىستارىنا بايلانىستى الداعى بىرنەشە ايدا جۇمىسىن توقتاتاتىنى حابارلانعان.

«ەير استانا» مالىمدەمەسىندە قازاقستانداعى ازاماتتىق اۆياتسيا سۋبەكتىلەرى تۇتىناتىن اۆياكەروسيننىڭ 70 پايىزى رەسەيدەن يمپورتتالاتىنى جانە ونىڭ جەتكىزىلۋى تۇراقتى ەمەسى ايتىلعان. «رەسەيلىك ءونىم وندىرۋشىلەردىڭ ساياساتى قالدىق ءونىمدى ساتۋ پرينتسيپىنە نەگىزدەلگەن» دەلىنگەن مالىمدەمەدە.

اۆياكەروسين ەكسپورتتايتىن وزگە تۇركىمەنستان، ازەربايجان، بەلارۋس سياقتى ەلدەردىڭ دە ىشكى نارىعىندا تاپشىلىق بايقالعان.

ۇقساس جاڭالىقتار

Back to top button