ەلباسى بايبەكتى قاي ءىسى ءۇشىن ماقتاپ، قاي كەمشىلىگى ءۇشىن سىنادى؟

ەلباسى الماتىعا جۇمىس ساپارى بارىسىندا قالا باسشىلىعىنىڭ جەتىستىكتەرىن اتاپ ءوتتى. كەمشىلىكتەرىن دە كورسەتتى. Baq.kz پرەزيدەنت سوزىندەگى الماتى اكىمدىگىنىڭ جاقسى جۇمىسى جانە كەمشىلىكتەرى ايتىلعان تۇستارعا شولۋ جاسادى. 

نازارباەۆ قالا اكىمدىگىن قانداي ىستەرى ءۇشىن ماقتادى؟

الماتىنىڭ ينفراقۇرىلىمى جاقسارىپ كەلە جاتقانى ءۇشىن

«سوڭعى ەكى جىل ىشىندە قالادا 100 مىڭ اعاش وتىرعىزىلىپ، 42 شاقىرىمداي ارىق جۇيەسى قالىپقا كەلتىرىلدى، 60 شاقىرىمنان استام ۆەلوسيپەد جولى سالىندى»، – دەدى نۇرسۇلتان نازارباەۆ.

سونىمەن قاتار ول «سوڭعى بەس جىلدا ونىڭ دامۋىنا بيۋدجەتتەن 430 ميلليارد تەڭگەدەن استام قاراجات جۇمسالدى. 30 جولايرىق جەلىسى سالىنىپ، 330 شاقىرىم ينجەنەرلىك جەلى ىسكە قوسىلدى، مەترو دامىپ كەلە جاتىر» دەدى.

قالاعا كەلەتىن تۋريستەر سانى ارتقانى ءۇشىن

«بۇگىندە شەتەلدىك ءتۋريستىڭ ءاربىر ەكىنشىسى الماتىنى كەلىپ كورەدى. قالادا كوپتەگەن قوناقۇيلەر، تەاترلار، مۋزەيلەر مەن سپورت نىساندارى بار. بيىل تۋريستەر سانىنىڭ ارتقانى بايقالۋدا. بۇعان «ەكسپو-2017» حالىقارالىق كورمەسىنىڭ ءوتۋى دە سەپتىگىن تيگىزدى»، – دەدى قازاقستان پرەزيدەنتى.

ەكونوميكالىق ورتالىق ءرولىن جاقسى اتقارىپ كەلە جاتقانى ءۇشىن

«قالا ەلىمىزدىڭ ءىرى ەكونوميكالىق ورتالىعى ءارى رەسپۋبليكالىق بيۋدجەتتىڭ دونورى رەتىندە قالىپتاستى»، – دەدى مەملەكەت باسشىسى.

قالانىڭ تاريحي كەلبەتىن جاساۋ جۇمىستارى ءۇشىن

«الماتىنىڭ تاريحي ورتالىعىنىڭ ۇشتەن ءبىرى جاڭعىرتىلدى. بۇل قالا تۇرعىندارىن قۋانتىپ، تۋريستەردى تارتادى».

قالانىڭ ەكولوگياسى جاقسارعانى ءۇشىن

«سوڭعى جىلدارى اۋانى لاستاۋ يندەكسى 20 پايىزعا تومەندەدى. وسى جۇمىستى جالعاستىرا بەرۋ كەرەك»، – دەدى پرەزيدەنت.

نازارباەۆ قالا اكىمدىگىن نە ءۇشىن سىنادى؟

شاعىن جانە ورتا بيزنەستى قولداماي وتىرعانى ءۇشىن

«قازىر الماتىنىڭ شاعىن جانە ورتا بيزنەسى نەگىزىنەن بانك نەسيەسى ەسەبىنەن قارجىلاندىرىلۋدا. بۇل ورايدا بيىل شاعىن بيزنەسكە بەرىلگەن بانك نەسيەسىنىڭ 43 پايىزعا ازايعانى بايقالىپ وتىر. اكىمدىك پەن «دامۋ» قورىنىڭ بيزنەستى قولداۋ كولەمى نەبارى ەكى پايىزعا تەڭ»، – دەدى ەلباسى.

يننوۆاتسيالىق جوبالاردىڭ جوقتىعى ءۇشىن

«الماتىدا ەلىمىزدىڭ بارلىق نەگىزگى جوعارى وقۋ ورىندارى، سونىڭ ىشىندە ساتباەۆ اتىنداعى ءىرى تەحنيكالىق وقۋ ورنى ورنالاسقان. الايدا، ءالى كۇنگە دەيىن ەلەۋلى يننوۆاتسيالىق ازىرلەمەلەر جاسالعان جوق. اكىمدىك مۇددەلى مەملەكەتتىك ورگاندارمەن بىرلەسىپ، وسى ماسەلەگە قاتىستى ءتيىستى شارالار قابىلداۋعا ءتيىس».

«الاتاۋ» تەحنوپاركىن پايدالانا الماي وتىرعانى ءۇشىن

«ونىڭ قۇرىلىسىنا بيۋدجەت ەسەبىنەن 20 ميلليارد تەڭگە جۇمسالىپ، 12 جىل ىشىندە ارنايى ەكونوميكالىق ايماقتىڭ جۇمىسىنا 22 ميلليارد تەڭگە جەكە ينۆەستيتسيا تارتىلدى. اكىمدىك ونىڭ جۇمىسىنا ىقپال ەتە الماي وتىر» دەدى نازارباەۆ.

قالادا پايداعا اسپاي جاتقان جەرلەردىڭ كوپتىگى ءۇشىن

«بۇگىندە قالاداعى جەردىڭ 500 گەكتارى ءالى يگەرىلمەگەن. جەر – كەز كەلگەن ءىرى قالانى دامىتۋدىڭ باستى اكتيۆى. ساۋلەت جانە قۇرىلىس ورگاندارىنىڭ جۇمىسىن تۇبەگەيلى قايتا قاراستىرۋ قاجەت. قالا قۇرىلىسى ساياساتى قازىرگى زامانعى ترەندتەرگە ساي بولۋعا ءتيىس»، – دەدى پرەزيدەنت.

الماتىداعى كولىك كەپتەلىسى پروبلەماسى شەشىلمەگەنى ءۇشىن

«شەشىمىن تاپپاعان ماسەلەلەر ءالى دە كوپ. ەڭ الدىمەن، بۇل قالانىڭ كولىك جۇكتەمەسىنە قاتىستى. كۇن سايىن 700 مىڭ اۆتوكولىك قاتىنايدى. بۇل ماسەلەنى سمارت-تەحنولوگيالار بازاسىندا كولىك جۇيەسىنىڭ «اقىلدى» ەلەمەنتتەرىن ەنگىزۋ ارقىلى شەشۋ قاجەت. ول قالا تۇرعىندارىنىڭ تۇرمىسىن مەيلىنشە جايلى ەتۋ ءۇشىن كولىكتىڭ ءتيىمدى جۇيەسىن قالىپتاستىرۋعا مۇمكىندىك بەرەدى»، – دەدى نۇرسۇلتان نازارباەۆ.

ۇقساس جاڭالىقتار

Back to top button