وڭتۇستىكقازاقستاندىقتار قايراتقا تەمىر تۇلپار مىنگىزدى

وڭتۇستىك قازاقستان وبلىسىنىڭ بوكس فەدەراتسياسى الەم چەمپيونى اتانعان قايرات ەراليەۆكە كولىك سىيلادى. ماراپاتتان باپكەرى مىرزاعالي ايتجانوۆ تا قۇر قالمادى، دەپ حابارلايدى قازاقپارات.

فەدەراتسيا باسشىلىعى الەم چەمپيونىنا  ارنايى قۇرمەت كورسەتىپ، «تويوتا كامري-55» اۆتوكولىگىن تارتۋ ەتتى. سپورتشىنىڭ باپكەرى  مىرزاعالي ايتجانوۆ تا ءدال وسىنداي  تەمىر تۇلپار ءمىنىپ قايتتى.

بۇدان بولەك، قازاقستاننىڭ بوكس بويىنشا ۇلتتىق قۇرامانىڭ باس باپكەرىنە اۋىلداستارى ات مىنگىزىپ، يىعىنا شاپان جاپتى.

ايتا كەتەيىك، گامبۋرگتە بوكستان اۋەسقويلار اراسىندا وتكەن ءحىح الەم چەمپيوناتىندا قازاقستان قۇراماسى 1 التىن، 2 كۇمىس، 3 قولا جۇلدەنى ولجالاپ، جالپىكوماندالىق ەسەپتە 3-ءشى ورىنعا تۇراقتاعان بولاتىن. ءدۇبىرلى دودادا وڭتۇستىكقازاقستاندىق بوكسشى قايرات ەراليەۆ التىن مەدالدى جەڭىپ الىپ، الەم چەمپيونى اتاندى.

 

ۇقساس جاڭالىقتار

Back to top button