قازاقستان مەن وزبەكستان اراسىنداعى ساۋدا-ساتتىق 35 پايىزعا ءوستى

 2017 جىلدىڭ وتكەن 7 ايىندا وزبەكستان مەن قازاقستان اراسىنداعى ساۋدا 35 پايىزعا ءوستى. بۇل تۋرالى پرەزيدەنت نازارباەۆ تاشكەنتتە باق وكىلدەرى ءۇشىن بريفينگ كەزىندە مالىمدەدى دەپ حابارلايدى اقوردانىڭ ءباسپاسوز قىزمەتى.

نازارباەۆ ەكىجاقتى باعىت بويىنشا قاتىناستاردى جانداندىرۋ ءوزارا تاۋار اينالىمىنا وڭ ىقپال ەتىپ، سونىڭ ناتيجەسىندە ەكىجاقتى ساۋدا اينالىمى وسكەنىن ايتادى.

«2020 جىلعا قاراي تاۋار اينالىمىن 5 ميلليارد دوللارعا جەتكىزۋ مىندەتى قويىلدى. وسىعان وراي، ۇكىمەتتەرىمىزگە پايدالانىلماعان بارلىق رەزەرۆتى جۇمىلدىرۋ جونىندە تاپسىرما بەرىلدى» ، — دەدى.

قازاقستان پرەزيدەنتى سونداي-اق ەنەرگەتيكا سالاسىنداعى ينۆەستيتسيالىق سەرىكتەستىك پەن ىنتىماقتاستىقتى كەڭەيتۋ قاجەتتىگىنە نازار اۋداردى.

«ورتا مەرزىمدەگى پەرسپەكتيۆادا بىرلەسكەن 2-3 ءىرى ينۆەستيتسيالىق جوبانى ىسكە اسىرۋعا ۋاعدالاستىق. ەلدەرىمىزدىڭ گاز سالاسىنداعى ىنتىماقتاستىعى ءتيىمدى دامىپ كەلەدى. ۇكىمەتتەرىمىزگە ەكى جاقتىڭ مۇددەسىنە سايكەس جاڭا گاز جوبالارىن ازىرلەۋ تاپسىرىلدى»، – دەدى نۇرسۇلتان نازارباەۆ.

پرەزيدەنت نازارباەۆتىڭ ساپارى كەزىندە، ەكى ەلدىڭ ۇكىمەتتەرى ءوزارا قارىم-قاتىناس پەن ىنتىماقتاستىقتى ودان ءارى دامىتۋعا باعىتتالعان بىرقاتار ەكونوميكالىق قۇجاتتارعا قول قويعان.

 

ۇقساس جاڭالىقتار

Back to top button