توقاەۆ سەنات توراعالىعىنا قايتا سايلاندى

قر پارلامەنتى سەناتىنىڭ توراعاسى قىزمەتىنە قاسىم-جومارت كەمەل ۇلى توقاەۆ قايتا سايلاندى دەپ جازادى قازاقپارات.

بۇگىن سەناتتىڭ جالپى وتىرىسىنا قر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ قاتىسىپ، سەناتورلار الدىندا ەلباسىنىڭ قر پارلامەنتى سەناتانىڭ توراعاسىن سايلاۋ تۋرالى حاتىن وقىپ بەردى.

«قازاقستان رەسپۋبليكاسى كونستيتۋتسياسىنىڭ 58-بابى1-تارماعىنا سايكەس، قاسىم-جومارت كەمەل ۇلى توقاەۆتى قر پارلامەتى سەناتىنىڭ توراعاسى قىزمەتىنە سايلاۋدى ۇسىنامىن»، – دەلىنگەن حاتتا.

«ەلباسى نۇرسۇلتان ءابىش ۇلى نازارباەۆتىڭ ماعان تاعى دا سەنىم ارتقانى مەن ءۇشىن زور مارتەبە ءارى ۇلكەن جاۋاپكەرشىلىك دەپ بىلەمىن. قازاقستان تاۋەلسىزدىك العان كەزدەن باستاپ مەن ەلباسىنىڭ سەنىمىنە يە بولىپ، ونىڭ تاپسىرمالارىن ورىنداپ كەلە جاتىرمىن. ءبىزدىڭ پرەزيدەنتىمىزدى الەم جۇرتشىلىعى عالامدىق دەڭگەيدەگى ساياساتكەر، ۇلى رەفورماتور رەتىندە قۇرمەتتەيدى، شىن مانىندەگى تاريحي تۇلعا دەپ بىلەدى. ەلباسىنىڭ كورەگەن باسشىلىعىمەن ەلىمىز بيىك بەلەستەردى باعىندىرىپ، الەمدەگى تانىمال ءارى ابىرويلى ەلدەردىڭ قاتارىنا قوسىلدى. مەملەكەت باسشىسىنىڭ ساليقالى، كورەگەن ساياساتىن ىسكە اسىرۋ مەن ءۇشىن ارقاشان جاۋاپتى جانە زور مارتەبەلى مىندەت. پرەزيدەنتتىڭ سەنىمىن اقتاۋعا بار كۇش-جىگەرىمدى جۇمسايتىن بولامىن»، – دەدى ءوز سوزىندە قاسىم-جومارت توقاەۆ.

اتاپ ايتقاندا، پرەزيدەنتتىڭ ۇسىنۋى بويىنشا دەپۋتاتتار جاسىرىن داۋىس بەرۋ ارقىلى ق.توقاەۆتى قازاقستان رەسپۋبليكاسى پارلامەنتى سەناتىنىڭ توراعاسى ەتىپ سايلادى.

قاسىم-جومارت كەمەل ۇلى 1953 جىلى 17 مامىردا تۋعان. ماسكەۋ مەملەكەتتىك حالىقارالىق قاتىناستار ينستيتۋتىن، پەكين لينگۆيستيكالىق ينستيتۋتىن (كحر)، رەسەي فەدەراتسياسى سىرتقى ىستەر مينيسترلىگىنىڭ ديپلوماتيالىق اكادەمياسىن بىتىرگەن. ساياسي عىلىمدارىنىڭ دوكتورى. رەسەي فەدەراتسياسى سىرتقى ىستەر مينيسترلىگى ديپلوماتيالىق اكادەمياسىنىڭ قۇرمەتتى دوكتورى جانە پروفەسسورى. جەنەۆا ديپلوماتيا جانە حالىقارالىق قاتىناستار ينستيتۋتىنىڭ قۇرمەتتى دوكتورى. بۇكىلالەمدىك جاراتىلىستانۋ جانە گۋمانيتارلىق اكادەمياسىنىڭ تولىق مۇشەسى. ديپلوماتيالىق دارەجەسى – توتەنشە جانە وكىلەتتى ەلشى. قازاقستان رەسپۋبليكاسىنىڭ پرەمەر-ءمينيسترى، مەملەكەتتىك حاتشى، سىرتقى ىستەر ءمينيسترى. ءۇشىنشى، ءتورتىنشى سايلانىمداعى قازاقستان رەسپۋبليكاسى پارلامەنتى سەناتىنىڭ توراعاسى. بۇۇ باس حاتشىسىنىڭ ورىنباسارى، بۇۇ-نىڭ جەنەۆاداعى بولىمشەسىنىڭ باس ديرەكتورى، قارۋسىزداندىرۋ كونفەرەنتسياسىنىڭ باس حاتشىسىنىڭ قىزمەتىنەن 2013 جىلعى 16 قازاندا قازاقستان رەسپۋبليكاسى پرەزيدەنتىنىڭ جارلىعىمەن پارلامەنت سەناتىنىڭ دەپۋتاتتىعىنا تاعايىندالىپ، قازاقستان رەسپۋبليكاسى پارلامەنتى سەناتىنىڭ توراعاسى بولىپ سايلاندى.

ۇقساس جاڭالىقتار

Back to top button