ديماشتىڭ جانكۇيەرلەرى ادەپ كودەكسىن قابىلدادى

ديماش قۇدايبەرگەنوۆتىڭ جانكۇيەرلەرى بارلىقتارىنا بىردەي ورتاق قۇجات قابىلدادى. اتالعان قۇجاتتا جانكۇيەرلەردىڭ انشىمەن قارىم-قاتىناستا ۇستانۋى ءتيىس ەرەجەلەر جازىلعان. جاڭالىقپەن العاشقىلاردىڭ ءبىرى بولىپ شولپان تاباەۆا ءبولىستى.بۇل تۋرالى Stan.kz حابارلايدى.

بىرنەشە ساعات بۇرىن ديماش قۇدايبەرگەنوۆتىڭ جانكۇيەرلىك توپتارى انشىمەن قارىم-قاتىناستارىنا قاتىستى ورتاق قۇجات قابىلدادى. اتالعان قۇجاتتا جانكۇيەرلەردىڭ مىنەز-قۇلقىنا بايلانىستى 10 ەرەجە جازىلعان. قۇجاتتىڭ مازمۇنى تومەندەگىدەي:

ديماش – بۇكىل حالىقتىڭ، بۇكىل الەمنىڭ تانىمال سۇيىكتىسى بولعاندىقتان، جانكۇيەرلەردىڭ ونىمەن بىرگە سۋرەتكە ءتۇسىپ، وعان دەگەن سۇيىسپەنشىلىگى مەن ريزاشىلىعىن بىلدىرگىلەرى كەلەتىنىن تۇسىنۋگە بولادى. بىراق ءبىز كوپ بولعانىمىزبەن، ديماش تەڭى جوق دارا جۇلدىز. كەيبىر كەزدە جۇزدەگەن ادام جينالعان توپتىڭ جاعىمسىز قىلىقتارىن باستان وتكىزۋ وڭاي ەمەس، ءتىپتى قاۋىپتى دە بولۋى مۇمكىن. ءار ادامنىڭ جەكە كەڭىستىگىن سىيلاۋ كەرەك. سوندىقتان ءبىز بارلىق جانكۇيەرلەردى ديماشتى كەزدەستىرگەن كەزدە ادەپ ساقتاۋ ەرەجەلەرىن قولدانۋىن سۇرايمىز.

1. ارنايى قورشاۋدان اسىپ ءتۇسىپ، ءانشىنىڭ ءجۇرۋ جولىنا بوگەت جاساماۋ.

2. ءانشىنىڭ جەكە كەڭىستىگىن قۇرمەتتەپ، ونىڭ شاقىرۋىنسىز ارا-قاشىقتىقتى بۇزباۋ.

3. ءانشىنىڭ قالاۋىنسىز قۇشاقتاپ، قول سوزىپ، ءسۇيىپ، ءتۇرلى سىيلىق زاتتاردى بەرۋگە تىرىسپاۋ. ويتكەنى كوپتەگەن تاكتيلدى بايلانىس ءتۇرلى قاتەردى تۋدىرادى.

4. كەزدەسۋلەرگە كىشكەنتاي بۇلدىرشىندەردى ەرتپەۋ. سەبەبى، ولار ادام كوپ شوعىرلانعان جەردە جاراقات الۋلارى مۇمكىن.

5. ءانشىنىڭ كيىمدەرىنىڭ، جەكە زاتتارىنىڭ بولىگىن كادەسىي رەتىندە جىرتىپ الماۋ.

6. ءوزىنىڭ جەكە شاقىرۋىنسىز “سەلفي” جاساماۋ. ءانشىنىڭ ءوزى جانكۇيەرلەرىمەن بىرگە توپتىق فوتوسۋرەتتەر جاساۋعا تىرىسادى.

7. كوزىنە زيان كەلتىرمەۋ ءۇشىن تەلەفوندار مەن فوتواپپاراتتاردىڭ جارقىلىن قولدانباۋ.

8. ءانشىنىڭ اياق استىنا گۇل، ءتۇرلى كامپيت پەن سىيلىقتاردى لاقتىرماۋ.

9. ەگەر كەزدەسۋ كۇنى سىزگە سۋىق ءتيىپ قالسا، مىندەتتى تۇردە ماسكا كيۋ.

10. ەگەر انشىگە ارنالعان گۇلدەر مەن سىيلىقتارىڭىز بولسا، تاسىمالداۋعا قولايلى بولاتىنداي وراپ، كومەكشىلەرى نەمەسە ۇيىمداستىرۋشىلارى ارقىلى سىيعا تارتۋ.

ۇقساس جاڭالىقتار

Back to top button