ءابليازوۆتىڭ سىبايلاسى دەپ ايىپتالعان جانبولات ماماي سوتتا سوڭعى ءسوزىن ايتتى

«ءابليازوۆتىڭ ۇرلاعان قارجىسىنىڭ ءبىر بولىگىنىڭ ءىزىن گازەتى ارقىلى جاسىرعان» دەگەن ايىپپەن ءىستى بولعان جۋرناليسكە سەيسەنبى كۇنى سوتتا سوڭعى ءسوزىن ايتۋ مۇمكىندىگى بەرىلدى، دەپ حابارلايدى ورتالىق ازيانىڭ جاڭالىقتار قىزمەتى. 

قىركۇيەكتىڭ 6-ءسى كۇنى الماتى قالاسىنىڭ مەدەۋ اۋداندىق 2-سوتىندا «تريبۋنا. ساياسي قالام» گازەتى باس رەداكتورىنىڭ مىندەتىن اتقارۋشى جانبولات مامايعا قاتىستى سوت پروتسەسى ارى قاراي جالعاستى.

بۇگىنگى سوت وتىرىسى تەك قانا جانبولات مامايدىڭ سوڭعى سوزىمەن باستالىپ، سونىمەن اياقتالدى. ول قىركۇيەكتىڭ 4-ىندە وتكەن جارىسسوزدەن سوڭ ىزىنشە سوڭعى ءسوز سويلەۋگە دايىن ەكەندىگىن ايتقان، بىراق سۋديا داۋرەن ماۋكەەۆ رۇقسات ەتپەگەن.

«جانبولات ماماي سوڭعى سوزىندە وزىنە تاعىلعان ايىپتى مويىندامايتىنىن ايتتى. ونىڭ سوزىنشە، «تريبۋنا. ساياسي قالام» گازەتى ەشكىمنىڭ تاپسىرىسىن ورىنداۋمەن شۇعىلدانباعان، تاۋەلسىز بولعا،م».

– گازەتتە نە جازۋ كەرەكتىگى تۋرالى ەشكىم نۇسقاۋ بەرە العان جوق. رەداكتسيا ساياساتىن وسى گازەتتىڭ قىزمەتكەرلەرى مەن اۆتورلارى عانا انىقتادى. 2012 جىلدان باستاپ قولعا العان جوبانى ۇيىمداستىرۋعا تولەگەن جۇكەەۆ كومەكتەستى. جاقسىلىق جارىمبەتوۆ اقشالاي كومەكتەسكەنى دە راس. بىراق ودان العان كومەگىم زاڭعا قايشى ەمەس بولاتىن. جارىمبەتوۆ ازاماتتىق قوعامدى دامىتۋ ءۇشىن كومەكتەسكىسى كەلدى. مەن قازىردىڭ وزىندە جاقسىلىق جارىمبەتوۆكە رەنجىمەيمىن، – دەدى ول.

ول ءجارىسسوز كەزىندە «بتا بانك باسقارما توراعاسىنىڭ بۇرىنعى ورىنباسارى جاقسىلىق جارىمبەتوۆتەن اقشا العانىن، بىراق ول كەزدە جارىمبەتوۆكە قاتىستى ەشقانداي سوت بولماعانىن، سوندىقتان ونى قىلمىس دەپ ەسەپتەمەيتىنىن» ايتقان ەدى.

جانبولات ماماي سوڭعى ءسوز كەزىندە وسىعان دەيىن ايىپتاۋشى پروكۋروردىڭ جازانى جەڭىلدەتۋ تۋرالى ۇسىنىسىن قوعامنىڭ ىقپالى دەپ سانايتىنىن ايتتى.

جانبولات ماماي بۇگىنگى سوزىندە ءوزى قاماۋعا الىنعالى قۇقىعىن قورعاپ كەلە جاتقان حالىقارالىق قۇقىق قورعاۋ ۇيىمدارىنىڭ قازاقستانداعى وكىلدىكتەرىنە جانە ءوزى تۋرالى مالىمەت تاراتقان اقپارات قۇرالدارىنا العىسىن ءبىلدىردى.

مامايدىڭ سوڭعى ءسوزى بىتكەن سوڭ سۋديا ۇكىم سارسەنبى، قىركۇيەكتىڭ 7-ءسى كۇنى ساعات 12-دە جاريالاناتىن حابارلاپ، سوت وتىرىسىن اياقتادى.

ۇقساس جاڭالىقتار

Back to top button