سىناقتان سۇرىنگەندەر كاسىپسىز قالمايدى

«نۇر وتان» پارتياسى ۇبت-عا قاتىسپاعان جانە ۇپايى شەكتى دەڭگەيگە جەتپەگەن مەكتەپ تۇلەكتەرىنە كومەك كورسەتۋ شارالارىن جالعاستىرۋدا. اقتوبە وبلىسى، مۇعالجار اۋداندىق پارتيا فيليالىندا «ءساتتى قادام» پارتيالىق جوباسىنىڭ ءۇشىنشى باعىتىن جۇزەگە اسىرۋ ماقساتىندا دوڭگەلەك ۇستەل ءوتتى. ءىس-شاراعا اۋداندىق ءماسليحات دەپۋتاتى نۇريباي سارسەنوۆ، اۋداندىق جۇمىسپەن قامتۋ ءبولىمىنىڭ، كاسىبي ءبىلىم بەرەتىن وقۋ ورىندارىنىڭ باسشىلارى مەن ماماندارى، ۇبت-عا قاتىسپاعان جانە ۇپايى شەكتى دەڭگەيگە جەتپەگەن مەكتەپ تۇلەكتەرى قاتىستى.

 

پارتيا اۋداندىق فيليالى توراعاسىنىڭ ءبىرىنشى ورىنباسارى قۇرانيا ايماعامبەتوۆتىڭ ايتۋىنشا، بيىل بىتىرگەن 488 تۇلەكتىڭ 91-ءى ۇبت-عا قاتىسپاعان. ۇبت-عا قاتىسقانداردىڭ 30-ى شەكتى مەجەنى باعىندىرا المادى.

– ءتۇسىندىرۋ جۇمىستارىنىڭ ناتيجەسىندە ۇبت-عا قاتىسپاعان 91 تۇلەكتىڭ 81-ءى كاسىپتىك-تەحنيكالىق ءبىلىم الۋدى ءجون كوردى. قۇجات تاپسىرۋعا ۇلگەرمەگەندەر ارناۋلى وقۋ ورىندارىنىڭ سىرتتاي ءبولىمى تۋرالى مالىمەت الۋى ءۇشىن بۇگىنگى شاراعا كوللەدج باسشىلارىن دا شاقىرىپ وتىرمىز، – دەدى قۇرانيا ايماعامبەتوۆ.

جيىندا قاندىاعاش ونەركاسىپتىك-ەكونوميكالىق كوللەدجىنىڭ قابىلداۋ كوميسسياسىنىڭ مامانى ايگەرىم بۋحاليەۆا كوللەدجگە بيىل 125 بالا قابىلدانعانىن ايتتى. ولار 5 ماماندىق بويىنشا ءبىلىم الادى. كوللەدج جانىنان 50 ورىندىق جاتاقحانا، شاكىرتاقى قاراستىرىلعانىن جەتكىزدى.

ال مۇعالجار گۋمانيتارلىق-تەحنيكالىق كوللەدجىندە قۇقىقتانۋ، مۇناي جانە گاز سكۆاجينالارى جانە بۇرعىلاۋ جۇمىسىنىڭ تەحنولوگياسى، ەسەپ جانە اۋديت، ەلەكترمەن قامتاماسىز ەتۋ، تەمىرجول جىلجىمالى قۇرامدارىن پايدالانۋ جانە تەحنيكالىق كۇتۋ جانە تاعى دا باسقا ماماندىقتار وقىتىلادى. كۇندىزگى بولىمگە بيىل 81 بالا قابىلدانسا، سىرتتاي بولىمگە قابىلداۋ ءجۇرىپ جاتىر ەكەن.

سونداي-اق، جيىندا تۇلەكتەرگە بوس جۇمىس ورىندارى ۇسىنىلدى. اۋداندىق جۇمىسپەن قامتۋ ورتالىعىنىڭ ديرەكتورى تولەۋلى ماحيموۆ «سيليكات-ا» جانە «بازالت-ا» جشس-دەگى جوعارى جانە ارناۋلى ءبىلىمدى تالاپ ەتپەيتىن بوس جۇمىس ورىندارىمەن تانىستىردى. ۇبت-عا قاتىسپاعان تۇلەك نۇرحان جاساقباەۆ جيىندا اقتوبە پوليتەحنيكالىق كوللەدجىن تاڭداعانىن ايتتى. ول اۆتومەحانيك ماماندىعى بويىنشا ءبىلىم الماق.

– پارتيانىڭ اۋداندىق فيليالى بىرنەشە رەت شاقىرىپ، اقپارات بەردى. ناتيجەسىندە وقۋىمدى اقتوبە پوليتەحنيكالىق كوللەدجىندە جالعاستىراتىن بولىپ شەشتىم. بىزگە وسىنداي مۇمكىندىكتەر ۇسىنعان پارتيالىقتارعا ريزاشىلىعىم شەكسىز، – دەيدى ول.

اقتوبە وبلىسىنىڭ قوبدا اۋدانىندا دا نۇروتاندىقتار ۇبت-عا قاتىسپاعان جانە ۇپايى شەكتى دەڭگەيگە جەتپەگەن مەكتەپ تۇلەكتەرىنە كومەك كورسەتۋ شارالارىن جالعاستىرۋدا. كەشە پارتيانىڭ قوبدا اۋداندىق فيليالىندا «ءساتتى قادام» پارتيالىق جوباسىنىڭ ءۇشىنشى باعىتىن جۇزەگە اسىرۋ ماقساتىندا دوڭگەلەك ۇستەل ءوتتى.

قوبدا اۋدانىندا بيىل 186 تۇلەك مەكتەپ بىتىرگەن. ونىڭ 40-ى ۇبت-عا قاتىسپاعان بولسا، 13-ءى ۇبت-دان شەكتى مەجەنى باعىندىرا المادى. پارتيا فيليالى وسىعان دەيىن تۇلەكتەرمەن 4 رەت كەزدەسۋ وتكىزدى. وتكىزىلگەن ءىس-شارالاردىڭ ناتيجەسىندە ۇبت-دان شەكتى مەجەنى باعىندىرا الماعان تۇلەكتەردىڭ 3-ءى جوو-نا، 9-ى كاسىپتىك تەحنيكالىق ءبىلىم بەرەتىن وقۋ ورىندارىنا ءتۇستى، 1-ءى اسكەرگە شاقىرتىلعان.

– ۇبت-عا قاتىسپاعان تۇلەكتەردىڭ 5-ءى جوو-نا، 24-ءى كاسىپتىك ءبىلىم بەرەتىن وقۋ ورىندارىنا ءتۇستى، 2-ءى اسكەر قاتارىنا شاقىرىلدى، 5-ءى جۇمىسقا ورنالاستى. ال قالعان تورتەۋىن بۇگىنگى شاراعا شاقىردىق، –  دەدى پارتيا فيليالى توراعاسىنىڭ ءبىرىنشى ورىنباسارى بەرىكباي قۇرمانيازوۆ.

ءىس-شارا بارىسىندا اۋداندىق ءماسليحات دەپۋتاتى بەكبولات تولىباەۆ پەن اۋداندىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى ءرازيا جولدىباەۆا ولارعا بوس جۇمىس ورىندارىن ۇسىندى.

–  اۋدان بويىنشا 31 بوس جۇمىس ورنى بار. ونىڭ 6-ى جوعارى جانە ارناۋلى ءبىلىمدى تالاپ ەتپەيدى. اتاپ ايتقاندا «قوبدا جەر» جشس، «امانباي» شق-نا  جۇمىسشىلار كەرەك، –  دەدى ءرازيا جولدىباەۆا. جيىنعا قاتىسقان تۇلەكتەر جوو-نىڭ سىرتتاي بولىمىنە وقۋعا تۇسپەسە، ۇسىنىستى قابىلدايتىندىقتارىن ايتتى جانە پارتيالىقتارعا ريزاشىلىقتارىن ءبىلدىردى.

– مەن مەحانيزاتور ماماندىعى بويىنشا قوبدا كوپسالالى كوللەدجىنە وقۋعا ءتۇستىم. جاتاقحانادا جاتىپ وقيمىن، شاكىرتاقى دا الامىن. وقۋ ورنىنىڭ باسشىلىعى جۇمىس تابۋعا كومەكتەسەتىندىكتەرىن ايتتى. ۇنجىرعام تۇسكەندە دەمەۋ بولىپ، كاسىپتىك–تەحنيكالىق ءبىلىمنىڭ ارتىقشىلىقتارىن تۇسىندىرگەندەرىڭىز ءۇشىن ريزامىن، – دەدى مەكتەپ تۇلەگى رۇستەم بەكمۇراتوۆ.

ۇقساس جاڭالىقتار

Back to top button