Польшада экс-президент Лех Валенсаға қарсы іс қозғалды

Польшада Нобель сыйлығының лауреаты, экс-президент Лех Валенсаға қарсы іс қозғалды. Оны өткен ғасырдың 70-жылдары коммунистердің арнайы қызметіне жұмыс істеді, жалған ант берді деп айыптайды. Валенса Польша халықтық республикасына "Болек" деген бүркеншік атпен жұмыс істеді деген ақпарат 2008 жылы пайда болған. Бірақ экс-президентке айып тек былтыр ақпан айында тағылған. Ол кезде елдің қауіпсіздік қызметінің басшысы болған, марқұм Чеслав Кищактың үйінен құжаттар салынған конверт табылған. Ол құжат 1970-1976 жылдары "Болек" деген бүркеншік атпен жұмыс істеген агентке қатысты болған. Іске Краковтағы сот сараптау институтының мамандарын тартқан. Ол "Болектің" қойған қолдары мен президенттің қол таңбаларын салыстырған. Прокурор Анджей Позорский сараптама нәтижесі бойынша 1970 жылдың 21 желтоқсанынан бері экс-президенттің коммунистерге жұмыс істегені белгілі болды дейді. Онда Валенса берген ақпараты үшін ақша алғаны жөнінде 17 рет қол қойған. Валенсаның өзі табылған материалдың жалған екенін мәлімдеген. Ол мұны өзінің қарсыластарының кек алу үшін жасап жатқанын айтқан.