وربۇلاق شايقاسى بولعان جەرگە ەسكەرتكىش قويىلدى

«تۋعان جەر» باعدارلاماسى اياسىندا الماتى وبلىسىنداعى وربۇلاق شايقاسى بولعان جەرگە ەسكەرتكىش قويىلدى، دەپ حابارلايدى 24.kz.

سالماعى جارتى توننا تاقتادا «قازاق ەلىنىڭ تاۋەلسىزدىگى مەن ەركىندىگى ءۇشىن جوڭعار باسقىنشىلارىمەن شايقاستا جەڭىسكە جەتكەن ايبىندى قازاق ساربازدارىنا ۇرپاقتارى اتىنان!» دەگەن جازۋ بار. بۇل وسىدان ءتورت عاسىرعا جۋىق ۋاقىت بۇرىن جوڭعاردىڭ 50 مىڭ اسكەرىن 700 قولمەن توقتاتقان قازاق ساربازدارىنىڭ رۋحىنا باعىشتالعان شارا. سەبەبى مۇنداي جەڭىس الەم تاريحىندا بولعان ەمەس.

كەلەر جىلى وربۇلاق شايقاسىنىڭ 375 جىلدىعىن ەل بولىپ اتاپ وتكەلى وتىرمىز. بۇگىنگى شارا سول تاريحي ءمان-ماعىناسى زور تويدىڭ الدىنداعى تاماشا سىي بولدى دەيدى قوناقتار.

بەكسۇلتان نۇرجەكەەۆ، جازۋشى:

– بۇل اۋىزبىرشىلىكتىڭ جەڭىسى. سول جەڭىسكە، مىنە، 375 جىل تولۋى قارساڭىندا جاستار جينالىپ كەلىپ، مىنا بەلگىنى قويىپ جاتىرمىز. بابالارىمىز ريزا بولسىن، سولاردىڭ رۋحىنا ءبىز ريزامىز دەگەن ءسوز. كەلەسى جىلعى ۇلكەن تويدىڭ الدىنداعى بۇل ۇلكەن ءبىر شارا بولدى.

رۋستام الپىسباەۆ، وبلىستىق ىشكى ساياسات باسقارماسىنىڭ باسشىسى: 

– سالماعى جارتى تونناداي بولادى. نەگىزىنەن قاراجات بۇعان بولىنگەن جوق. ۇنەمدەلگەن قاراجاتتان ۇيىمداستىرىپ وتىرمىز. ماقساتى دا ماڭىزى دا وتە ەرەكشە، وتە وزەكتى. سەبەبى قازىرگى اقپارات زامانىندا اقپارات كەڭىستىگى وسىنداي كەرەكتى اقپاراتتارمەن تولىعۋى كەرەك.

ۇقساس جاڭالىقتار

Back to top button