Алматыда жаңа жолайрық пайдалануға берілді

Алматыда жаңа жолайрық пайдалануға берілді

Астана күніне орай Алматыда жаңа жолайырығы пайдалануға берілді, деп хабарлайды ҚазАқпарат тілшісі қалалық әкімдікке сілтеме жасап. Алматыда Бөкейханов көшесінің қилысы мен Солтүстік айналым бойында жаңа жол айырығы ашылды. Бұрын осы учаскеде тәулігіне 211 мың автомобиль өтетін болса, жаңа нысанның арқасында жолдың өткізу қабілеті 361 мың көлікке артып, 70% құрады. Жаңа жолайырығы Дорожник, Шаңырақ, Өжет ықшам аудандарындағы көлік тығыздығын 20% қысқартады. Жобаның технологиялық жағынан күрделі болуына қарамастан нысан жоспарланған мерзімінен алты ай бұрын берілді. Жолайырығының құрылысы 2015 жылдың соңында басталған еді, оның жалпы құны 8,6 млрд. теңге. Алматы әкімі Бауыржан Байбек 10 жыл ішінде қалада 30 жолайырығы іске қосылғанын, бірақ халықаралық тәжірибе жеке көліктер үшін инфрақұрылым көп жасалса, қаланың көлік тарфигінің арта түсетіндігін көрсетті. «Бүгінгі күні қалада кешенді көлік реформасы жүруде. Кіші көлік айналымының өткізу қабілетін арттыру үшін үш жолайырығы салынуда, ал қаланың орталық көшелерінде жаяу жүргіншіге басымдық берілуде. Жеңіл және үлкен рельсті көлік енгізу жобалары,қоғамдық көлік үшін арнайы жолақтар жасалуда, жаңа бағыттар ашылуда, жылжымалы құрам жаңаруда, велобекеттер орнатылуда, жасыл желек көлемі ұлғаюда.Осының барлығы қала экологиясын жақсартып, өмір сүру үшін барынша жайлы ете түсуде», - деп атап өткен әкім, жаңа жолайырығының айналасын көріктендіру жөнінде тапсырма берді. Естеріңізге сала кетейік, қазіргі кезде Фурманов көшесі Жансүгіров көшесіне дейін теміржол арқылы эстакадамен бірге, Хмельницкий көшесі Сүйінбай даңғылынан Жас қанат ықшам ауданына дейін, Абай даңғылы Әуезов көшесінен Қалқаманға дейін, одан қала шекарасына дейін үңгіленуде. Сейфуллин - Жансүгіров,Рысқұлов даңғылы,Емцов көшесі мен Құлжа трассасы қиылыстарында жолайырық құрылыстары одан әрі жалғасуда, BRTжелісі бойынша көше-жол жүйесі жаңаруда,Наурызбай ауданындағы Қалқаман және Алты алаш елді мекендерінде ұзындығы 17,335 км болатын, Алатау ауданындағы Алғабас және Ақбұлақ елді мекендерінде ұзындығы 10,993 км болатын жолдар салынуда. Сонымен қатар, Алматыда жүргіншілерге басымдылық беру үшін бірқатар көшелер қайта жасалуда. Биылғы жылдың аяғына дейін Панфилов, Жібек жолы, Гоголь,Қабанбай батыр көшелері мен «Астана» алаңына тастар төселеді, жасыл желек отырғызылады, кіші архитектуралық формалар қойылады, спорт инвентарьлары орнатылып, балалар алаңдары пайда болады, веложолдар абаттандырылады, нысандар текшелері жарықтандырылады. Осыған қатысты жасалған жобалардың ешқайсысында жасыл желекті бұзу, бұрыннан барын кесу қарастырылмаған. Көлеңкелі кеңістікті кеңейту үшін биік болып өсетін қайың, емен, терек және басқа да ағаш түрлері, мыңнан астам бұта-шіліктер отырғызылатын болады.