كەيكى باتىر كەسەنەسىنىڭ قۇرىلىسى باستالدى

1916 جىلعى ۇلت ازاتتىق كوتەرىلىستىڭ داڭقتى قولباسشىلارىنىڭ ءبىرى، اتاقتى مەرگەن كەيكى باتىر كەسەنەسىنىڭ  قۇرىلىسى باستالدى. مەملەكەتتىك كوميسسيا كەيكى باتىردىڭ سۇيەگىن ونىڭ تۋعان جەرى – قوستاناي وبلىسى امانگەلدى اۋدانىنىڭ تاستى اۋىلىندا جەرلەۋ تۋرالى شەشىم قابىلدادى.

سانكت-پەتەربور قالاسىنداعى كۋنستكامەرادا 93 جىل بويى ساقتالىپ كەلگەن كەيكى باتىردىڭ باس سۇيەگى ەلىمىزگە وتكەن جىلى قايتارىلعان بولاتىن. ول قازان ايىنىڭ باسىندا استاناعا جەتكىزىلدى. كەيىن دنك ساراپتاما جۇرگىزۋ جانە قالپىنا كەلتىرۋ ءۇشىن ماجارستانعا جىبەرىلىپ، ۆەنگريا مۋزەيىنىڭ باس ديرەكتورى زولتان كورشوشقا تاپسىرىلدى. ايتا كەتەيىك، اتالمىش مۋزەي وسىعان دەيىن 70 رەت ادامنىڭ باس سۇيەگىن قالپىنا كەلتىرۋ جۇمىستارىن جۇرگىزگەن. سونىڭ ىشىندە ءابىلحايىر حاننىڭ دا باس سۇيەگىن قالپىنا كەلتىرگەن. ەكى ايدان كەيىن قوعام قايراتكەرى، ساياساتتانۋشى بەرىك ابدىعالي ۇلى ماجارلىق عالىمداردىڭ ەڭبەك ناتيجەلەرىن ايتىپ، كەيكى باتىردىڭ باس سۇيەگىنىڭ قالپىنا كەلتىرىلگەن سۋرەتىن جاريالادى. قر مادەنيەت جانە سپورت مينيسترلىگىندە وتكەن ءباسپاسوز ءماسليحاتىندا قر مەملەكەتتىك ورتالىق مۋزەيىنىڭ ديرەكتورى نۇرسان ءالىمباي كەيكى باتىردىڭ باس سۇيەگىنىڭ قاتتى زاقىمدانۋى سالدارىنان زەرتتەۋ جۇمىستارى قيىنعا سوققانىن ءمالىم ەتتى.

«باتىردىڭ باس سۇيەگى قاتتى زاقىمدانۋى سالدارىنان ءمۇسىندى جاساۋ قيىنعا ءتۇستى. انتروپولوگتاردىڭ ايتۋى بويىنشا، سوققى جەتى جەردەن تيگەن ەكەن، وسى رەتتە سول جاق بولىگى مەن شۇيدەسى وپىرىلىپ قالعان. سونىمەن قاتار الدىڭعى تىستەرى تۇگەل تالقاندالعان. مۇرىن سۇيەگىنە دە قاتتى زاقىم كەلگەن. ونىڭ پلاستيكالىق انتروپولوگيالىق كەلبەتىن جاساۋ كەزىندە قيىندىق تۋاتىنى ءسوزسىز. بىراق، قازىرگى تەحنولوگيالار باس سۇيەكتى قالپىنا كەلتىرۋگە قاۋقارلى»،-دەگەن بولاتىن ءالىمباي. عالىمنىڭ سوزىنە قاراعاندا، ماجار ماماندارى ەكى اي بويى وزدەرىنىڭ جۇمىستارىن ىسىرىپ قويىپ، ەلىمىزدىڭ ءوتىنىشى بويىنشا باتىردىڭ باس سۇيەگىمەن اينالىستى.  «قوستاناي تاڭى» وبلىستىق گازەتىنىڭ (اۆتورى – گۇلبارشىن سمايلوۆا) جازۋىنشا، كەيكى باتىردىڭ كەسەنەسى دەمەۋشىلەردىڭ قارجىسىنا تاستى اۋىلىنىڭ قىرىنداعى، جالداما-ارقالىق تاس جولىنىڭ ماڭىنان سالىنا باستادى. بۇگىندە ونىڭ ىرگەتاسى قۇيىلىپ قويىلدى. كەسەنەنى سالۋدى ۇيىمداستىرعان استانا قالاسىنداعى «ەL-DAANA» ارحيتەكتۋرالىق بيۋروسى. ونىڭ باسشىسى – ەلۆيرا نۇراليەۆا. بۇل بيۋرو ارقالىق قالاسىنداعى «الليۋمينستروي» جشس-مەن كەلىسىمشارتقا وتىرىپ، قۇرىلىستىڭ ءبىراز بولىگىن سولارعا سالدىرتۋدى شەشكەن. «الليۋمينستروي» جشس – تورعاي ايماعىنداعى باستى قۇرىلىس مەكەمەسى. اۋدانىمىزدا وسى مەكەمە سالعان ءساندى دە ءماندى قۇرىلىستار بار. اتاپ ايتقاندا، اۋدان ورتالىعىندا «قالامقاس» بالاباقشاسى مەن قۇمكەشۋ اۋىلىنداعى ەكى قاباتتى ورتا مەكتەپتىڭ قۇرىلىسىن وسى سەرىكتەستىكتىڭ ماماندارى مەن قۇرىلىسشىلارى سالىپ شىقتى. اتالعان ەكى قۇرىلىستىڭ ەكەۋى دە وزدەرىنىڭ ساپالى سالىنۋىمەن ەرەكشەلەنەدى. دەمەك، «الليۋمينستروي» جشس-ءنىڭ ۇجىمى كەسەنەنىڭ وزدەرىنە جۇكتەلگەن بولىگىن ويداعىداي سالىپ شىعادى دەگەن ءۇمىت بار. ال كەسەنەنىڭ كۇمبەزدەرى مەن باسقا دا بىرقاتار جەرلەرىن «ەL-DAANA»-نىڭ ءوز قۇرىلىسشىلارى سالماق. ويتكەنى، بۇلار شەبەرلىكتى تالاپ ەتەدى. بۇل بيۋرو وزدەرىنىڭ  ساۋلەت ونەرىندەگى جەتىستىكتەرىمەن تانىلعان قۇرىلىس مەكەمەسى. دەمەك، ولار باتىر كەسەنەسىنىڭ تالاپقا ساي سالىنىپ شىعۋىنا تولىق كەپىلدىك بەرەدى دەگەن سەنىم بار»، – دەپ جازادى اۆتور. كەسەنە قۇرىلىسىنىڭ بارىسىن وبلىستىق جانە اۋداندىق اكىمدىكتەر مەن ءتيىستى سالالىق مەكەمەلەر ءوز باقىلاۋلارىنا الدى.  ايتا كەتەيىك، بيىلعى ماۋسىم ايىندا كەيكى باتىردىڭ مۇردەسى جەرلەنگەن ورىندى تاۋىپ، بابامىزدىڭ باس سۇيەگىن ءتان سۇيەگىمەن قوسىپ جەرلەۋدى ماقسات ەتكەن ءبىر توپ قوعام قايراتكەرى ەنگەن ەكسپەديتسيا جولعا شىقتى.

ۇقساس جاڭالىقتار

Back to top button