Су тасқынынан зардап шеккен петропавлдық отбасыларға 40 млн теңге өтемақы берілді

Су тасқынынан зардап шеккен петропавлдық отбасыларға 40 млн теңге өтемақы берілді

 Көктемгі су тасқынынан зардап шеккен петропавлдық 120 отбасыға жалпы көлемде 40 миллион теңге өтемақы берілді. Шығынды қайтару жұмысы әрімен қарай жалғасатын болады, деді жергілікті атқамінерлер. Қызыл су жайылған кезде облыс орталығының 4 шағын ауданы зардап шеккен болатын. Мамырдың он екісінде залалды анықтауға кіріскен комиссия барлығы 256 үйді тексерген, деп хабарлайды Астана арнасы.  "Комиссия шығынды бағалаушылармен бірлесіп анықтады. Өтемақы 24 мамырдан бастап төленіп келеді. Шығын қалалық бюджеттің есебінен өтеліп жатыр. Қаражат тұрғындарға дер кезінде қайтарылуда. Әзірге 120 отбасыға 40 миллион теңге таратылған болатын", - дейді Петропавл қаласы әкімінің орынбасары Сәния Смаилова. Өтемақыны төлеу науқаны Қызылжар ауданында да басталды. Мұнда табиғи апаттан барлығы жүзден астам баспана зардап шеккен. 14 баспананың иесі талап еткен сомаға ие болды. Комиссияның қорытындысына сәйкес, бұл ауданда шығынды өтеуге шамамен 67 миллион теңге қажет. Ал тасқыннан алғашқылардың бірі болып жапа шеккен Рузаев ауылы тұрғындарының барлығы өтемақыны алып болған. Мұнда 108 жанұяның шығыны қайтарылған. Әрбір отбасыға шамамен жарты миллион теңгеден төленді. Ал су тасқыны шайып кеткен 8 үйдің иесіне жаңа баспана сатып алынды. Қаражат облыстық бюджет пен қайырымдылық қорлардың есебінен өтелді.