تۇركىستاندا ياساۋي كەسەنەسى ماڭىنداعى ۇيلەردىڭ ءبارى سۇرىلمەك

تۇركىستان قالاسىنىڭ اكىمدىگى قوجا احمەت ياساۋي كەسەنەسىنىڭ ماڭىندا ونداعان جىل بۇرىن سالىنعان ۇيلەر ايماقتاعى ءتۋريزمنىڭ دامۋىنا كەدەرگىسىن كەلتىرىپ وتىر دەپ ەسەپتەيدى. سوندىقتان بۇل ۇيلەردىڭ ءبارى سۇرىلەتىن بولدى، دەپ حابارلايدى sn.kz. 

بىلتىر تۇركىستانعا 1 ميلليونعا جۋىق تۋريست كەلگەن ەكەن. ەندى ولاردىڭ سانىن تاعى ارتتىرۋ ءۇشىن جەرگىلىكتى بيلىك وكىلدەرى 129 جەكەمەنشىك ءۇيدى ءسۇرىپ تاستاماقشى. ولاردىڭ ورنىنا كەلۋشى قوناقتارعا ارنالعان نىساندار بوي كوتەرەدى. الايدا، تۇرعىنار اكىمدىكتىڭ بۇل شەشىمىنە قارسى.

«بۇل كيەلى جەر. پرەزيدەنت مۇندا ءتۋريزمدى دامىتىڭدار دەدى، بىراق ادامداردىڭ كوز جاسى ارقىلى دامىتىڭدار دەمەگەن شىعار؟»، – دەيدى سۇلتانبەك دۇيسەنوۆ ەسىمدى تۇرعىن.

ءۇي يەلەرىنىڭ ايتۋىنشا، اكىمدىكتەن ەسكەرتۋ قاعاز وتكەن جىلدىڭ سوڭىندا كەلگەن ەكەن. ال، جۋىردا ارنايى ماماندار كەلىپ، ءۇيدىڭ باعاسىن ەسەپتەپ كەتكەن. دەگەنمەن، تۇرعىندار بۇل اقشانى تىم از دەپ قاناعاتتانباي وتىر.

«مەنىڭ ءۇيىمدى 7 ميلليون تەڭگەگە باعالادى. مەن نە ىستەيمىن ول اقشانى؟ مەن 7 ميلليونعا جارتى ءۇي دە ساتىپ الا المايمىن عوي. جەر بولسا قىمبات تۇرادى. قالادا قازىر جەر دە بەرىپ جاتقان جوق»، – دەيدى سەرگەي امينوۆ ەسىمدى تۇرعىن.

اكىمدىكتەگىلەر بۇزىلعان ۇيلەردىڭ ورنىنا نە سالاتىنىن ءالى بىلمەيدى، بىراق جەرگىلىكتى تۇرعىنداردى رەنجىتپەيمىز دەپ وتىر.

«بۇل ءالى ناقتى باعا ەمەس. ەگەر تۇرعىندار نارازى بولسا قايتادان ەسەپتەيمىز. ال، سۇرىلگەن ۇيلەردىڭ ورنىنا نە سالىناتىنى ءالى بەلگىسىز. بىراق، سالىنادى. باسقا جەرگە سالا المايمىز. ويتكەنى، كەسەنە – باستى نىسان، وزگەلەرى سونىڭ اينالاسىنا سالىنۋى كەرەك»، – دەيدى تۇركىستان قالاسى اكىمىنىڭ ورىنباسارى تاجىبەك مۇساەۆ.

جەرگىلىكتى تۇرعىندار بولسا كاسىپكەرلەردىڭ بيزنەسى ءۇشىن كوشىرىلىپ جاتقاندارىنا سەنىمدى. ولار بۇل ورىندارعا قوناق ۇيلەر مەن مەيرامحانالار سالىنادى دەپ بولجاپ وتىر.

ۇقساس جاڭالىقتار

Back to top button