Петропавлдық полицейлер жаяу жүргіншілер жолағында велосипедпен өтіп бара жатқан 9 жасар баланы қағып кетті. Жарақат алған жеткіншек ауруханаға жатқызылған. Бұл туралы Sputnik Қазақстан хабарлады.
Сейсенбі күні қаланың әлеуметтік желілерінде пайда болған бейнежазбада патрулдік көлік жаяу жүргіншілерді өткізіп, енді қозғала бергенде, алдынан қатты жылдамдықпен велосипед мінген бала атып шығады, көлік баланы қағып кетеді. Содан кейін, шошып кеткен полицейлер жеткіншекке көмек көрсете бастаған. "Балаларға түсіндіріңіздер, жолдан өткен кезде, велосипедтен түсіп, жаяу жүріп өту керек. Бала бағдаршамның қызыл жануына 11 секунд қалғанда зуылдап келді, жүргізуші көрмей қалған ғой. Қатты жылдамдықпен келгендіктен, жол апаты болды. Егер бала бағдаршамның алдында түсіп, жаяу өтсе, мұндай жайт болмас еді", — деп жазады әлеуметтік желі қолданушылары. Айта кетейік, 9 жасар бала велосипедпен ересектердің қарауынсыз, жалғыз өзі келе жатқан, бұл да ережеге жатпайды. Облыстық Ішкі істер департаменті агенттікке хабарлағандай, оқиға 29 сәуір күні Бейбітшілік және Кәрім Сүтішев көшелерінің қиылысында болған. "Жол апаты Қылмыстық кодекстің 345 бабы 1-бөлігіне сәйкес сот алды тергеулердің бірыңғай реестріне енгізілді. Бала әртүрлі жарақатпен ауруханаға жатқызылған. Тергеу аясында бірқатар қажетті сараптама тағайындалды. Облыстық ІІД мәліметінше, көлік жүргізушісі облыстық наркологиялық диспансерде тексеріліп, ішімдік ішпегені анықталған.Петропавлдық полицей жаяу жүргіншілер жолағында 9 жасар баланы қағып кетті
Петропавлдық полицей жаяу жүргіншілер жолағында 9 жасар баланы қағып кетті
