Мемлекет басшысы Қасым-Жомарт Тоқаев III Стратегиялық серіктестер форумында соңғы жеті жылда Қазақстанда білім беру гранттарына бөлінген қаржы екі есе артып, 3,4 миллиард долларға жеткенін айтты, деп хабарлайды turkystan.kz.
«Білімге негізделген экономика құру азаматтарымыздың ұзақмерзімді конституциялық міндетіне айналды. Қазіргі және одан кейінгі үкіметтер оны тиісті деңгейде орындауға тиіс.
Бүгінде Қазақстанда 132 университет бар. Онда 800 мыңнан астам студент білім алады.
Соңғы жеті жылда Үкімет білім беру гранттарына бөлген қаржының көлемі екі есе көбейіп, 3,4 миллиард долларға жетті. Сондай-ақ ұдайы артып келе жатқан сұранысты өтеу үшін елімізде 281 студент жатақханасы бой көтерді. Бұл шаруа алдағы уақытта да жалғасады.
Бұдан бөлек, соңғы жылдары еліміздегі ғылымды қаржыландыру көлемі айтарлықтай ұлғайып, 590 миллион долларға жетті», – деді Қасым-Жомарт Тоқаев.