Ақмола облысында трактор аударылып, жүргізуші оқиға орнында қаза тапты. Қайғылы оқиға 14 қарашада Зеренді ауданында, Елікті ауылының маңында болған, деп хабарлайды turkystan.kz.
Ақмола облыстық полиция департаментінің баспасөз қызметінің мәліметінше, К-700 маркалы трактор аударылып кеткен.
«Оқиға салдарынан трактор жүргізушісі сол жерде көз жұмды. Аталған дерек бойынша қылмыстық іс қозғалды. Қазіргі уақытта оқиғаның барлық мән-жайын анықтауға бағытталған қажетті тергеу амалдары жүргізіліп жатыр», – деп хабарлады ведомство.
Ал Ақмола облысының мемлекеттік еңбек инспекциясы департаментінің мәліметінше, жұмыс берушіден жазатайым оқиға туралы ешқандай хабарлама түспеген. Қазір оқиғаның барлық мән-жайы анықталып жатыр.
«Жұмыс беруші жазатайым оқиға болғаны туралы хабарламаған жағдайда, оған әкімшілік жауапкершілік қарастырылған. Сонымен қатар жазатайым оқиға туралы тиісті хабарлама беру жөнінде нұсқама орындалуы тиіс», – деп толықтырды еңбек инспекциясы.