Құрылтай депутаты, "Әділет" партиясы фракциясының мүшесі Дихан Қамзабекұлы, Қазақстан Халық Кеңесінің мүшесі Абдулла Исматуллаев, Ауыл шаруашылығы вице-министрі Назгүл Хатепова және Су ресурстары және ирригация вице-министрі Талғат Момышев Түркістан қаласына жұмыс сапарымен барып, тұрғындармен бірқатар кездесу өткізді.
Сапар барысында республикалық жұмыс тобының мүшелері әлеуметтік және қоғамдық нысандарды аралап, азаматтық қоғам өкілдерімен, ғылыми қауымдастықпен, студенттермен, қала тұрғындарымен және медицина қызметкерлерімен жүздесті. Кездесулерде Мемлекет басшысының «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауында айқындалған басым бағыттар талқыланды.
«Достық үйінде» өткен басқосуда стратегиялық міндеттерді жүзеге асыру, қоғамдық келісім мен жалпыұлттық бірлікті нығайту, жастардың азаматтық белсенділігін арттыру және ұлттық құндылықтарды дәріптеу жайы сөз болды.
Құрылтай депутаты Дихан Қамзабекұлы Жолдаудың негізгі тұжырымдарына кеңінен тоқталып, ел дамуы үшін идеологиялық бағдарлардың маңызын атап өтті.
– Мемлекет басшысының Жолдауында айқындалған идеологиялық бағыттардың маңызы зор. Елдің дамуы тек экономикалық өсіммен немесе инфрақұрылымды жаңғыртумен ғана өлшенбейді. Ең алдымен, ол азаматтардың санасы мен қоғамдық құндылықтарға байланысты. Бүгінде бізге білімді, еңбекқор, отаншыл әрі инновациялық тұрғыда ойлайтын жас ұрпақ қажет. Осы тұста адалдық, әділдік, заңға құрмет және қоғамдық келісім қағидаттарын нығайту – стратегиялық міндеттердің бірі. Әсіресе, жастардың елге қызмет етуге, ұлттық құндылықтарды сақтауға және заманауи технологияларды меңгеруге деген ұмтылысын қалыптастыру айрықша маңызды, – деді Дихан Қамзабекұлы.
Депутаттың пікірінше, Жолдауда көтерілген бастамалар әрбір қазақстандықтың күнделікті ісінен көрініс табуы керек. Шынайы отаншылдық сөзбен емес, адал еңбекпен, сапалы біліммен, қоғамдық өмірге белсенді араласумен және ел болашағына жауапкершілікпен қараумен өлшенеді. Осы тұрғыдан алғанда, мемлекеттің табысты дамуы ортақ құндылықтарды ұстанған саналы қоғам мен азаматтық жауапкершілікке тікелей байланысты.
Бұдан кейін жұмыс тобы Қожа Ахмет Ясауи атындағы Халықаралық қазақ-түрік университетіне барып, ғылыми қауымдастық және профессор-оқытушылар құрамымен жүздесті. Басқосуда білім мен ғылымды дамыту, ғылыми әлеуетті арттыру, қоғамдық келісімді нығайту, аграрлық секторды жаңғырту және су ресурстарын тиімді пайдалану бағыттары талқыланды.
Делегацияның келесі кездесуі «Ұлы Дала елі» орталығында Халықаралық туризм және меймандостық университетінің студенттерімен өтті. Ашық диалог барысында спикерлер Жолдаудың негізгі басымдықтарын түсіндіріп, жастардың ел дамуындағы рөліне, азаматтық жауапкершілік пен ұлттық бірліктің мәніне тоқталды. Сонымен қатар ауыл шаруашылығы мен су ресурстарын тиімді басқару мәселелері қозғалды. Кездесу соңында студенттер өздерін толғандырған сауалдарын қойып, ұсыныс-пікірлерін ортаға салды.