Қарағандыда байланыс маманының кейпіне еніп, тұрғын үйлердің интернет кабельдерін ұрлады деген күдікпен 26 жастағы ер адам ұсталды. Оның әрекетінен бірнеше үй байланыссыз қалып, телекоммуникациялық компанияға 1,2 миллион теңгеден астам шығын келген, деп хабарлайды turkystan.kz.
Полиция мәліметінше, күдікті тұрғын үйлердің маңында өзін байланыс желісіне техникалық қызмет көрсететін маман ретінде көрсеткен. Ол кабельдерді тексеріп, жөндеу жұмыстарын жүргізіп жүргендей әрекет еткен. Сондықтан тұрғындар оның жұмысына күмәнданбаған. Алайда белгісіз ер адам кеткеннен кейін үйлерде интернет пен байланыс үзіліп қала бастаған. Осындай жағдай бірнеше рет қайталанған соң тұрғындар мамандардың көмегіне жүгінген.
Қала көшелерінің бірінде орнатылған қозғалыс датчигі бар бейнебақылау камерасы байланыс желілерінің маңында жүрген ер адамды түсіріп алған. Кадрларда оның коммуникациялық жабдықтармен жұмыс істеп жатқаны байқалған. Тұрғындар бастапқыда оны интернет провайдерінің қызметкері деп ойлаған. Бірақ желі қайта-қайта істен шыққаннан кейін күмән пайда болған.
Оқиға орнына шақырылған апаттық қызмет мамандары интернеттің үзілу себебін анықтаған. Тексеру барысында белгісіз адамның байланыс кабельдерін кесіп, алып кеткені белгілі болды. Полицияның мәліметінше, күдікті жалпы ұзындығы 120 метрден асатын кабельді ұрлаған.
Кабельдердің жоғалуына байланысты телекоммуникациялық компания полицияға арыз түсірген. Компанияға келтірілген материалдық шығын 1,2 миллион теңгеден асқан. Қарағанды қалалық полиция басқармасының қызметкерлері жедел-іздестіру шараларын жүргізіп, күдіктінің жеке басын анықтаған. Нәтижесінде осы іске қатысы болуы мүмкін 26 жастағы жергілікті тұрғын ұсталды.