Абай облысының Үржар ауданында жоғалып кеткен жеті жасар баланы полиция қызметкерлері аман-есен тапты. Бала елді мекеннен төрт шақырым қашықтықтағы ауыл шаруашылығы алқабында жүрген, деп хабарлайды turkystan.kz.
Оқиға Үржар ауданында болған. Абай облыстық полиция департаментінің мәліметінше, жеті жасар бала күндіз ата-әжесінің қарауында болған. Алайда бір уақытта ол үлкендердің назарынан тыс қалып, үйдің ауласынан өздігінен шығып кеткен.
Баланың жоғалғанын байқаған туыстары алдымен оны өз беттерінше іздеуге кіріскен. Бірақ бірнеше жерді қарағанымен, еш нәтиже болмаған. Осыдан кейін отбасы полициядан көмек сұраған. Баланың әжесі немересінің даму ерекшеліктері бар екенін айтып, оны мүмкіндігінше тезірек табуды өтінген.
Хабар түскен бойда тәртіп сақшылары іздестіру шараларын бастаған. Полиция қызметкерлері елді мекендегі аулаларды, көшелерді және баланың болуы ықтимал аумақтарды тексерген. Сонымен қатар су айдындарының маңы мен ауыл сыртындағы жерлер де назарға алынған. Іздестіру жұмыстары барысында полицейлер елді мекеннен алысырақ орналасқан ауыл шаруашылығы алқаптарын аралаған.
Нәтижесінде сағат 16:00 шамасында жоғалған бала табылды. Жеті жасар баланы полиция капитаны Азамат Дүйсебаев пен полиция аға лейтенанты Ролан Байтлеуов анықтаған. Ол Үржар елді мекенінен шамамен төрт шақырым жердегі егістік алқапта жүрген. Тәртіп сақшылары баланы тапқан бойда бұл туралы оның жақындарына хабарлаған.