Семей қаласында жеке тұрғын үйді жөндеу кезінде төбе жабындары опырылып, бір адам қираған құрылымдардың астында қалып қойды. Оқиға орнына шұғыл жеткен құтқарушылар ер адамды үйінді арасынан алып шықты, деп хабарлайды turkystan.kz.
Оқиға 25 қазан күні Семей қаласындағы жеке тұрғын үйлердің бірінде болған. Үй ішінде құрылыс-жөндеу жұмыстары жүргізіліп жатқанда төбе конструкциялары кенеттен опырылып түскен.
Салдарынан үйде болған ер адам қираған құрылыс материалдарының астында қысылып қалған. Оның өздігінен сыртқа шығуға мүмкіндігі болмаған.
Оқиға туралы ақпарат қалалық "112" шұғыл қызметіне келіп түскен. Хабарлама алынған бойда аталған мекенжайға Төтенше жағдайлар министрлігінің жедел-құтқару жасағы жіберілді.
Құтқарушылар оқиға орнына жеткен соң ер адамды үйінді астынан шығару жұмыстарына кіріскен. Мамандар қосымша жарақат келтірмеу үшін құлаған құрылымдарды абайлап алып, зардап шегушіні қауіпсіз жерге шығарған. Осыдан кейін ер адамға алғашқы көмек көрсетіліп, ол жедел медициналық жәрдем қызметкерлеріне тапсырылған.
Әзірге зардап шеккен тұрғынның денсаулық жағдайы мен алған жарақаттарының ауырлығы туралы толық ақпарат жарияланған жоқ. Сондай-ақ тұрғын үй төбесінің нақты қандай себеппен опырылғаны белгісіз.