Астанада 18 қабатты тұрғын үй кешенінде шыққан өрт кезінде төрт адам, соның ішінде екі бала құтқарылды. Бұл туралы ТЖМ баспасөз қызметі мәлімдеді, деп хабарлайды turkystan.kz.
Есіл ауданындағы Мәңгілік Ел даңғылында орналасқан 18 қабатты тұрғын үй кешенінің 14-қабатындағы пәтерден өрт шықты. Жиһаздар мен үй заттары жанған. Өрт туралы шақырту таңғы сағат 10:36-да түскен. Өрттің аумағы - 25 шаршы метр.
"ТЖД қызметкерлері құтқару маскаларының көмегімен төрт адамды құтқарып қалды, олардың екеуі - балалар", - деп нақтылады баспасөз қызметі.
Өрт толық сөндірілді. Ведомствоның баспасөз қызметінің мәліметінше, зардап шеккендер жоқ.
Төтенше жағдайлар министрлігі өрт кезінде дереу 112 нөміріне қоңырау шалып, лифтті пайдаланбау және құтқарушылардың нұсқауларын орындау қажетін ескертті.