Еуроодақ елдерінде Батыс Ніл вирусын жұқтырудың 1 715 жағдайы тіркеліп, 130 адам қайтыс болды. Бұл — бақылау жүргізіле бастағаннан бергі ең жоғары көрсеткіш. Бұған қоса, вирус бұрын мұндай жағдайлар тіркелмеген солтүстік аймақтарға да таралып жатыр, деп хабарлайды turkystan.kz.
Еуропалық аурулардың алдын алу және бақылау орталығының (ECDC) 7 қазандағы деректеріне сәйкес, биыл Еуропада маса арқылы таралатын Батыс Ніл вирусының маусымы ерекше қарқынды өтіп жатыр. Инфекцияның жергілікті жұғу жағдайлары Бельгия мен Нидерланд сияқты бұрын вирус анықталмаған елдерде де тіркелген.
Ең көп жағдай Италияда тіркелді: 748 адам вирус жұқтырған. Грекияда – 445, Францияда 144 жағдай тіркелді. Бұл екі елде де ауру жұқтыру көрсеткіші бұрын-соңды болмаған деңгейге жеткен. Нидерландта 59 жағдай анықталса, Бельгияда алғаш рет жергілікті жұғудың 15 жағдайы тіркелген.
ECDC мамандары вирустың солтүстікке қарай таралу үрдісі алдағы жылдары да жалғасуы мүмкін екенін ескертеді. Бұған адамдар мен жануарлардан инфекцияның жаңа ошақтарының анықталуы дәлел болып отыр.
Батыс Ніл вирусы негізінен жұқтырған масаның шағуы арқылы таралады. Оның табиғи айналымына масалар мен құстар қатысады. Адамдар мен жылқылар да инфекция жұқтыруы мүмкін. Сондықтан мамандар аурудың таралуын бақылау үшін медицина, ветеринария және қоршаған ортаны қорғау салаларының бірлесіп жұмыс істеуі қажет екенін атап өтеді.
Сонымен бірге тіркелген жағдайлар санының артуы аурудың ауырлығы да күшейді дегенді білдірмейді. ECDC мәліметінше, қайтыс болғандар, ауруханаға жатқызылғандар және жүйке жүйесі зақымданған науқастар саны соңғы онжылдықтағы көрсеткіштерден айтарлықтай ерекшеленбейді.
Инфекция жұқтырған адамдардың көпшілігінде ауру белгісіз өтуі мүмкін. Кейбірінде дене қызуы көтеріліп, басы ауырады, әлсіздік, бұлшықет ауыруы немесе теріде бөртпе пайда болады. Сирек жағдайда вирус ми қабынуы немесе ми қабықтарының қабынуы сияқты ауыр неврологиялық асқынуларға әкелуі мүмкін.
Егде жастағы адамдар мен иммундық жүйесі әлсіреген адамдарда аурудың ауыр өту қаупі жоғары. Адамдарға арналған мақұлданған вакцина әзірге жоқ, ал емдеу негізінен белгілерді жеңілдетуге және ауыр жағдайларда ауруханада қолдау көрсетуге бағытталған.
Мамандар инфекцияның алдын алу үшін масаға қарсы репеллент қолдануға, денені жауып тұратын кең киім киюге және терезелерге қорғаныш тор орнатуға кеңес береді. Масалардың үйге кіруін шектеу және олардың көбеюіне қолайлы орындарды азайту да маңызды.
ECDC өкілдерінің айтуынша, вирустың таралуын жыл сайын дәл болжау қиын. Сондықтан жаңа ошақтарды ерте анықтау, халықтың хабардарлығын арттыру және масаларға қарсы тиімді шараларды уақытында жүргізу инфекцияның салдарын азайтуға көмектеседі.