Ормуз бұғазында мыңдаған контейнер тасымалдауға қауқарлы жүк кемесі суға батып, оның жүгі теңізге шашылды. Әлеуметтік желілерде су бетінде қалқып жүрген жаңа iPhone телефондары мен қымбат парфюмерияны адамдар қайықпен жинап жүргені туралы видеолар тарады. Алайда кадрлардың осы оқиғаға қатысы бар-жоғы әзірге расталған жоқ, деп хабарлайды turkystan.kz.
Reuters агенттігінің мәліметінше, Сингапур туымен жүзген GFS Pride контейнер кемесі 14 қазанда Ормуз бұғазы маңында зақымданып, өрт шыққаннан кейін суға кеткен. Сингапурдың Теңіз және порт әкімшілігі кемедегі 21 адамның барлығы аман-есен эвакуацияланғанын, зардап шеккендер жоқ екенін хабарлады. Кеменің сыйымдылығы 2 824 стандартты контейнерге жеткенімен, апат кезінде оның бортында нақты қанша контейнер болғаны белгісіз.
Иран Ислам революциясы сақшылар корпусының әскери-теңіз күштері кеме рұқсат етілмеген әрі қауіпті бағытпен жүрген кезде теңіз минасына соғылғанын мәлімдеді. Алайда теңіз қауіпсіздігі жөніндегі мамандар кеменің минаға соғылғанын тәуелсіз түрде растайтын дәлел жоқ екенін атап өткен. Британдық UKMTO теңіз қауіпсіздігі орталығы да контейнер кемесіне белгісіз снаряд тигені туралы хабар алған. Бұл екі мәліметтің бір оқиғаға қатысты екені әзірге анықталмаған.
Оқиғадан кейін әлеуметтік желілерде теңізге шашылған жүк пен оны шағын қайықтармен жинап жүрген адамдар бейнеленген кадрлар тарады. Кейбір жарияланымдарда суда жаңа iPhone телефондары мен қымбат иіссулар қалқып жүргені айтылған. Бірақ The National басылымы бұл видеолардың қай жерде және қашан түсірілгенін, сондай-ақ олардың GFS Pride кемесінің апатына қатысы бар-жоғын тексеру мүмкін болмағанын жазды. Әлеуметтік желілерде осы оқиғаға қатысы бар деген жасанды интеллект көмегімен жасалған суреттер де тараған. Сондықтан теңізде тегін iPhone табылды деген ақпаратты расталған дерек ретінде қабылдауға негіз жоқ.
Бұл кезеңде аймақта тағы бір жүк кемесіне қатысты оқиға тіркелді. Reuters мәліметінше, Антигуа және Барбуда туымен жүзген Cape Dao құрғақ жүк кемесі 23 қыркүйекте снаряд тигеннен кейін бірнеше аптадан соң суға кеткен. Кеме экипажының бір мүшесі қаза тапқаны, қалғандарының эвакуацияланғаны хабарланды. Демек, соңғы ақпараттағы екі кеме де Біріккен Араб Әмірліктерінің туымен жүзген деген тұжырым дұрыс емес: GFS PrideСингапур туымен, ал Cape Dao Антигуа және Барбуда туымен жүзген.
Ормуз бұғазы – әлемдік энергетика үшін стратегиялық маңызы бар теңіз жолы. Соғысқа дейін бұл бағытпен күн сайын шамамен 125–140 ірі коммерциялық кеме өтетін. Әлемдік теңіз арқылы тасымалданатын мұнай мен сұйытылған табиғи газдың шамамен бестен бір бөлігі осы бұғаз арқылы жеткізілетін. Аймақтағы кемелерге шабуылдардың жиілеуі халықаралық теңіз тасымалының қауіпсіздігіне қатысты алаңдаушылықты күшейтіп отыр.