Алматы қаласындағы Республикалық физика-математика мектебінің (РФММ) оқушыларының жаппай улану дерегі бойынша қылмыстық іс қозғалды, деп хабарлайды turkystan.kz.
Қалалық полиция департаментінің мәліметінше, тергеу жұмыстарын Бостандық аудандық полиция басқармасы жүргізіп жатыр.
— Аталған дерек бойынша Бостандық аудандық полиция басқармасына қарасты полиция бөлімі қылмыстық іс қозғады. Санитариялық-эпидемиологиялық бақылау қызметінің тексеру қорытындысын қоса алғанда, бірқатар тергеу шараларының нәтижесінде оқиғаның мән-жайы анықталып, тиісті процессуалдық шешім қабылданады, — деп мәлімдеді полиция департаменті.
Бұған дейін Алматыдағы Республикалық физика-математика мектебінің 48 оқушысы ішек инфекциясына шалдығып, ауруханаға жатқызылғаны белгілі болған еді.
Оқу орнында ауру жұқтыру жағдайлары тіркелгеннен кейін санитариялық-эпидемияға қарсы кешенді іс-шаралар ұйымдастырылды. Денсаулық сақтау министрлігінің мәліметінше, мамандар мектептің ас блогын тексеріп, нәтижесінде санитариялық талаптардың бұзылғанын анықтаған.
Сондай-ақ Алматыдағы РФММ филиалының оқушылары уақытша қашықтан оқыту форматына көшірілгені хабарланды.