Албания астанасы Тирананың мэрі Эрион Велиай қамауда отырғанына қарамастан, қала тұрғындарына жасанды интеллект арқылы жасалған цифрлық аватары арқылы үндеу жолдады. ЖИ-аватар мэрдің атынан атқарылған жұмыстарды айтып, мектеп оқушыларына тегін түскі ас беруге уәде етті, деп хабарлайды turkystan.kz euronews.al-ға сілтеме жасап.
Тирана мэрі Эрион Велиай әлеуметтік желіде жасанды интеллект көмегімен жасалған бейнеролик жариялады. Онда оның цифрлық бейнесі қала әкімдігінің жұмысына шолу жасап, бірқатар әлеуметтік жобаларды атап өткен.
Велиайдың айтуынша, ол қазір 20 айдан бері өзін «кепілге алынған» жағдайдағыдай сезінеді. Сондықтан халыққа үндеуін бұл жолы жасанды интеллект арқылы жеткізуді жөн көрген.
«Мен ұмытпайтын тағы бір уәдем бар – мектептердегі тамақтандыру. Мені шынымен қамап қойды, тұзаққа түсірді. Бірақ бұл уәдемді мені жауып қойған камерадан да орындаймын», – делінген бейнежолдауда.
ЖИ-аватар Тиранада жаңа балабақшалар, мектептер мен бөбекжайлар салынғанын, сондай-ақ жер сілкінісінен кейін қалпына келтіру жұмыстары жүргізілгенін атап өтті.
Велиайдың әлеуметтік желідегі жазбасында «Тирана үшін 170 жаңа мектеп, балабақша және бөбекжай! Енді әр оқушыға тегін түскі ас. Ешқандай кедергі бізді тоқтатпайды!» деген сөздер жазылған.
Эрион Велиайдың өзі сыбайлас жемқорлыққа қатысты іс бойынша қамауда отыр. Осы жағдай оның қала басшысы ретінде ЖИ-аватар арқылы үндеу жасауын ерекше жағдайға айналдырып отыр.
Ал Албанияда жасанды интеллект мемлекеттік басқару саласына бұған дейін де енгізілген. Елде сыбайлас жемқорлықпен күреске жауапты ЖИ-министр қызметі де бар. Алайда оған да жемқорлыққа қатысты айып тағылған.
Осылайша, Албаниядағы жағдай жасанды интеллектінің мемлекеттік басқару мен саяси коммуникациядағы рөліне қатысты пікірталасты жаңа деңгейге шығарды: мэрдің өзі қамауда отырғанда, оның цифрлық көшірмесі қала тұрғындарына үндеу жасап, жаңа уәделер беріп отыр.