Павлодар облысында көлік жүргізу құқығы жоқ 16 жастағы жасөспірімнің мотоцикл айдауы анасының сот алдында жауап беруіне себеп болды, деп хабарлайды turkystan.kz.
Өңірлік соттың баспасөз қызметінің мәліметінше, оқиға 9 мамырда болған. Кәмелетке толмаған жасөспірім жүргізуші куәлігі болмағанына қарамастан мотоцикл тізгіндеген. Кейін оны полиция қызметкерлері тоқтатқан.
Осыдан кейін жасөспірімнің анасына баланы тәрбиелеу және оқыту жөніндегі ата-аналық міндеттерін тиісінше орындамағаны үшін әкімшілік іс қозғалған.
Сотта әйел кінәсін мойындап, болған жағдайдан кейін ұлымен профилактикалық әңгіме жүргізгенін айтқан. Сондай-ақ ол жұмыс істейтінін және баласын жалғыз тәрбиелеп отырғанын жеткізген.
Заң бойынша әйелге 10 тәулікке дейін әкімшілік қамау немесе 20 АЕК-ке дейін айыппұл салынуы мүмкін болған.
Сот оның кінәсін мойындағанын және асырауында кәмелетке толмаған баласы барын ескеріп, айыппұл мөлшерін 30 пайызға азайтты.
Нәтижесінде әйелге 60 550 теңге айыппұл салынды.