Алматы облысында 28 қыркүйекте магнитудасы 4,2 балдық жер сілкінісі тіркелді, деп хабарлайды turkystan.kz.
ҚР ҰЯО Деректер орталығының жедел мәліметіне сәйкес, 2026 жылғы 28 қыркүйекте Астана уақыты бойынша сағат 13:53-те (Гринвич уақыты бойынша сағат 08:53-те) Алматы облысында, Нарынқол ауылынан солтүстік-батысқа қарай 25 шақырым жерде жер сілкінісі болды.
Жер сілкінісінің эпицентр координаттары: солтүстік ендіктің 42,81 градусы, шығыс бойлықтың 79,89 градусы. Магнитудасы — mb=4,2. Энергетикалық класы — K=9,4. Ошақтың тереңдігі — 7 шақырым.
Бұған дейін бүгін, 28 қыркүйекте сағат 09:38-де жер сілкінісі тіркелгені хабарланған болатын. ҚР ТЖМ «ҰССИ» ЖШС мәліметінше, оның эпицентрі Алматы қаласынан оңтүстік-батысқа қарай 8 шақырым жерде орналасқан. Қаладағы есептік қарқындылығы 3–4 балды құрады.