Әлемге әйгілі қазақстандық әнші Димаш Құдайберген Ақтауда қаза тапқан әскери қызметшілерге қатысты көңіл айту жазбасын жариялады, деп хабарлайды turkystan.kz.
Өнер иесі әлеуметтік желідегі парақшасында 18-19 жастағы сарбаздардың қазасына байланысты ауыр қайғысын жеткізді.
«Біздің Ақтауда көз жұмған 18-19 жасар інілерімді қимай жүрегім ауырып, айтуға сөз таба алмай отырмын.
Балалық кезеңнен енді ғана шығып келе жатқан кезде жап-жас ғұмырлардың осылайша үзіліп кеткені...
Қаза болған бауырларымыздың ата-анасына, туған-туыстарына, жақындарына шын жүректен көңіл айтамын. Алла жүректеріңізге сабыр, өздеріңізге күш берсін.
Інілерімнің жатқан жері жайлы, топырағы торқа болсын. Жандары жәннатта болсын.
Е Алла, құдіреті күшті Алла, інілерімді алдынан жарылқағайсың. Ешбір ата-ана баласының артында қалмасын...
Елімізде мұндай қасірет енді қайталанбасын.
Қош болыңдар, бауырларым», – деп жазды Димаш Құдайберген.