Жасанды интеллект көбіне әйелдер жұмыс істейтін мамандықтарға екі есе қатты әсер етуі мүмкін. Мұндай қорытынды БҰҰ Халықаралық еңбек ұйымының 84 елдің дерегіне сүйенген жаңа зерттеуінде жасалған, деп хабарлайды turkystan.kz.
Зерттеуге сәйкес, әйелдер басым мамандықтардың 29%-ы генеративті жасанды интеллектінің ықпалына жоғары деңгейде ұшырайды. Ерлер көбірек жұмыс істейтін мамандықтарда бұл көрсеткіш 16%-ды құрайды.
Мұның басты себебі – әйелдердің кеңсе, әкімшілік және бизнесті қолдау қызметтерінде көбірек еңбек етуі. Мұндай жұмыстарда ақпарат өңдеу, құжат дайындау, кесте толтыру және басқа да қайталанатын міндеттер жиі кездеседі. Ал дәл осындай тапсырмаларды қазіргі генеративті ЖИ құралдары автоматтандыруға бейім.
Сонымен бірге сарапшылар бұл деректерді әйелдердің жұмыс орындары жаппай қысқарады деп түсіндірмеуге шақырады. Халықаралық еңбек ұйымының бағалауынша, көп жағдайда жасанды интеллект мамандықтың өзін толық жойғаннан гөрі, адамның атқаратын міндеттерін, қажетті дағдыларды және еңбек жағдайын өзгертеді.
Зерттеуде тағы бір мәселе атап өтіледі: әйелдер жасанды интеллектіні әзірлеу және онымен байланысты жаңа технологиялық мамандықтарда әлі де аз ұсынылған. Бұл бір жағынан жаңа жұмыс мүмкіндіктеріне қолжетімділікті шектесе, екінші жағынан технологиялардың қалай жасалып, қалай қолданылатынына әйелдердің ықпалын азайтады.
Халықаралық еңбек ұйымы алдағы өзгерістердің салдары технологияның өзіне ғана емес, мемлекеттер мен жұмыс берушілер қабылдайтын шешімдерге де байланысты екенін атап өтеді. Мамандар еңбек нарығындағы гендерлік бөліністі азайту, жаңа дағдыларды оқыту және әйелдердің ЖИ саласына қатысу мүмкіндігін кеңейту қажет деп санайды.