Терінің сау әрі серпімді болуы күтім құралдарына ғана емес, ағзаның қажетті қоректік заттарды жеткілікті алуына да байланысты. Әсіресе А, С, Е, В3 және D дәрумендері тері жасушаларының жаңаруына ықпал етіп, қорғаныш қабатын сақтап, коллаген түзеді, деп хабарлайды turkystan.kz.
С дәрумені коллаген синтезі үшін қажет. Коллаген терінің беріктігі мен серпімділігін сақтауға көмектеседі. Сонымен қатар бұл дәрумен антиоксидант ретінде жасушаларды тотығу әсерінен қорғайды. Оның негізгі көздері – цитрус жемістері, болгар бұрышы, қарақат, киви, брокколи мен қызанақ. Бұл туралы АҚШ Ұлттық денсаулық институтының мәліметінде айтылған.
А дәрумені жасушалардың өсуі мен жаңаруына қатысады. Ол түзетін ретиноид безеуді және күн сәулесінен зақымданған теріні емдеуде қолданылады. Алайда құрамында ретиноид бар дәрілерді немесе жоғары мөлшердегі қоспаларды дәрігердің кеңесінсіз қабылдауға болмайды. Әсіресе жүктілік кезінде олар қауіпті болуы мүмкін.
Е дәрумені жасуша қабықтарын бос радикалдардың әсерінен қорғайтын антиоксидант саналады. Ол жаңғақта, күнбағыс дәнінде, өсімдік майларында, авокадо мен жасыл жапырақты көкөністерде кездеседі.
В3 дәруменінің бір түрі – ниацинамид терінің қорғаныш қабатын сақтауға, ылғал жоғалуын азайтуға және қабынуды бәсеңдетуге көмектеседі. Сондықтан ол көптеген косметикалық құралдың құрамына қосылады. D дәрумені де жасушалардың бөлінуіне және терінің иммундық қызметіне қатысады.
Дегенмен терінің құрғауы, шамадан тыс майлануы немесе бөртпе шығуы белгілі бір дәруменнің тапшылығын бірден білдірмейді. Мұндай өзгерістерге гормондық ауытқу, дұрыс таңдалмаған күтім, аллергия және әртүрлі аурулар себеп болуы мүмкін. Сондықтан дәрумен тапшылығын тек сыртқы белгілерге қарап анықтау дұрыс емес.
Дәрумендерді бақылаусыз қабылдау да денсаулыққа зиян келтіруі мүмкін. Әсіресе ағзада жиналатын А, D және Е дәрумендерінің шамадан тыс мөлшері қауіпті. Қоспаларды талдау нәтижесі мен маманның кеңесіне сүйеніп қабылдаған жөн.
Терінің жастығын бір ғана дәрумен сақтап қала алмайды. Теңгерімді тамақтану, күннен қорғайтын құрал қолдану, жеткілікті ұйықтау, темекіден бас тарту және теріні дұрыс күту де маңызды.