Сот Щучинскідегі «Палау орталығы» кафесінде болған жарылысқа қатысты істі қарауды аяқтады. Бүгін сотталушыларға үкім жарияланды, деп хабарлайды turkystan.kz.
Кафе иесі мен газ баллондарына газ толтырған автогаз құю станциясының директорының әрқайсысы жеті жылға бас бостандығынан айырылды.
Ал газ баллондарын жеткізушіге сот алты жыл бас бостандығынан айыру жазасын тағайындады.
Сот процесінің басталғаны 2026 жылғы маусымда белгілі болған еді.
Еске салайық, 26 ақпанда Щучинск қаласында тұрғын үйге жапсарлас салынған бір қабатты кафеде газ-ауа қоспасы жарылып, кейін өрт шыққан. Апаттық-құтқару жұмыстары барысында әрқайсысының сыйымдылығы 50 литр болатын бес газ баллоны және екі оттегі баллоны өрттен сыртқа шығарылды. Бұл қайталама жарылыстардың алдын алуға мүмкіндік берді.
Оқиға салдарынан 28 адам зардап шекті, оның 13-і ауруханаға жатқызылды, тағы 8 адам медициналық көмек көрсетілгеннен кейін үйлеріне жіберілді. 7 адам қаза тапты.
Аудан әкімі Арай Садықовтың айтуынша, қаза тапқандардың отбасыларына 2 млн теңгеден біржолғы материалдық көмек, ал зардап шеккендерге 1 млн теңгеден төлеу міндеттемесі алынған.
Қазақстан Республикасының Төтенше жағдайлар министрі, генерал-лейтенант Шыңғыс Әріновтің тапсырмасы бойынша қайғылы оқиғаны жан-жақты тергеу үшін ведомствоаралық комиссия құрылды.
Щучинскідегі жарылыстан кейін қаза тапқан бес адамның отбасына несиелерін өтеуге көмектесуге уәде берілді.
3 наурыз күні таңертең сегізінші адамның қайтыс болғаны, кейін тоғызыншы адамның да көз жұмғаны белгілі болды.
2 наурызда кафе иесі ұсталды.
Істі тергеу аясында 20 сәуірде автомобиль газ құю станциясының директоры мен газ баллондарын жеткізуші ұсталды.