Ембі қаласындағы Жем теміржол вокзалы жаңа кейіпке енді. 1905 жылы салынған тарихи ғимарат Мемлекет басшысы Қасым-Жомарт Тоқаевтың тапсырмасына сәйкес жаңғыртылып, жолаушыларға қайта есік ашты.
Бір ғасырдан астам уақыт бойы талай сапардың куәсі болған вокзал Ембі тұрғындары үшін жай ғана теміржол нысаны емес. Бұл – жолға шыққан адамның үміті мен сағынышы тоғысатын, біреу қоштасып, енді бірі қауышатын орын.
Жаңғырту барысында вокзал ғимараты толық жаңартылды. Оның жалпы ауданы 387,5 шаршы метрден 421,2 шаршы метрге дейін ұлғайды. Шатыр мен қасбеті жаңартылып, бөлмелері толық жөнделді. Кәріз, су, жылу және электр жүйелері қайта жаңғыртылды. Перрон жөнделіп, вокзал маңы абаттандырылды. Жолаушыларға жайлы болсын деген ниетпен жаңа жиһаз, қажетті жабдықтар сатып алынған.
Ембінің көне тарихын шаң басқан архивтерден бөлек, осы кезге дейін сақталған қаладағы ескі ғимараттардан да аңғаруға болады. Қала тұрғыны Райымбек Мұсағалиев 2000 жылдардың соңында вокзалға жақын орналасқан №4 мектепті басқарған. Оның айтуынша, мектеп ғимараты да Жем вокзалы сияқты патша өкіметі тұсында салынған көне нысанның бірі.
– Мектеп шатырын жөндеу кезінде төбедегі қаңылтырдан 1902 жылғы патша өкіметінің клеймосын көрдім. Сол сәтте ғимараттың қаншама тарихты бастан өткергенін сезіндім, – дейді ол.
Ембінің теміржол шежіресінде локомотив депосының да орны ерекше. ХХ ғасырдың алғашқы жылдарынан бастау алатын депо кейін теміржолдағы талай техникалық жаңарудың куәсі болды. Соғыстан кейінгі кезеңде мұнда паровоздан тепловозға көшу дәуірі басталды.
Бүгінде сол тарихи теміржол кеңістігінің тағы бір нысаны заман талабына сай жаңарып отыр.
Жем стансасы арқылы тәулігіне орта есеппен кемінде 350-400 жолаушы өтеді. Бұл стансаға жолаушы таситын 24 пойыз қатынайды. Сондықтан вокзалдың жаңаруы – тарихи ғимаратты сақтаумен қатар, тұрғындар мен жолаушылардың күнделікті жайлылығын арттыратын маңызды қадам.
Вокзал ғимаратының қайта ашылу салтанатында облыс әкімінің орынбасары Асылбек Есенбаев жаңғыртудың басты мақсаты жолаушыларға заманауи, жайлы әрі қауіпсіз жағдай жасау екенін атап өтті.
Ал жергілікті тұрғын Нағашыбай Аленов жаңарған вокзал – жергілікті жұрттың көңілін серпілткенін айтады.
– Вокзалымыз күрделі жөндеуден өтіп, жаңарған келбетте қайта ашылып отыр. Бұл – ең алдымен халыққа қолайлы болуы үшін жасалып отырған игі іс, – дейді ол.
Бір ғасырдан астам тарихы бар Жем вокзалы енді жаңа дәуірге қадам басты. Ғимараттың келбеті жаңарғанымен, оның басты миссиясы өзгерген жоқ: жолаушыны қарсы алу, ақ жолға шығарып салу, Ембіні елдің өзге өңірлерімен байланыстыру.
Тарихы сақталған вокзал енді сол тарихтың келесі бетіне куә болмақ.
Жанна КӨПЖАНОВА