Қызылорда облысы Жаңақорған ауданында бірнеше күн бұрын жоғалып кеткен 20 жастағы Мейіржан Рүстемнің мәйіті құдықтан табылды, деп хабарлайды turkystan.kz «AstanaTV» арнасына сілтеме жасап.
Қайғылы оқиғаға байланысты «Адам өлтіру» бабы бойынша қылмыстық іс қозғалып, марқұмның 15 жастағы туған інісі күдікке ілінген.
Мейіржан 30 мамырда үйінің ауласына төсек салып, түнеген. Алайда таңертең оның жоғалып кеткені белгілі болған. Жақындары өз беттерінше іздеу жүргізіп, бір тәуліктен кейін жігіттің денесін үйінен шамамен 400 метр жердегі жергілікті су құбырының құдығынан тапқан.
Марқұмның туыстары оның денесінде көгерген іздер болғанын, сондай-ақ мойнынан жіпке ұқсас із байқалғанын айтқан. Кей деректе мәйіттің көрпеге оралған күйде табылғаны көрсетілген.
Құқық қорғау органдары қылмысқа күдікті ретінде Мейіржанның 15 жастағы туған інісін ұстаған. Ол сот санкциясымен қамауға алынған. Алайда марқұмның ата-анасы бұл нұсқамен келіспейді. Олардың айтуынша, жасөспірімнің ағасына қастандық жасағанына сену қиын.
Отбасы бұған дейін үйден ақша ұрлау фактілері болғанын айтып, қылмысқа басқа адамдардың қатысы болуы мүмкін деген болжам жасаған. Туыстары істің жан-жақты әрі объективті тергелуін сұрап отыр.
Қазір тергеу жалғасып жатыр. Оқиғаның нақты мән-жайы мен Мейіржанның өліміне кімнің қатысы барын тергеу анықтайды.