Оқиға кешкі уақытта, шамамен сағат 21:00-де қаладағы көпқабатты тұрғын үйлердің бірінде болған, деп хабарлайды turkystan.kz.
Осы уақытта Ұлттық ұланы 5517 әскери бөлімінің қатардағы жауынгері Армат Абылғалиев үйінде болған. Кіреберістен көмек сұраған дауыстарды ести сала, ол дереу пәтерінен сыртқа шықты.
Баспалдақ алаңында әскери қызметкер қатты қорқып тұрған баланы кездестірді. Бала бесінші қабаттағы пәтерлердің бірінде өрт шығып, ішінде екі інісі қалып қойғанын айтты.
Уақыт жоғалтпай, ұландық бесінші қабатқа көтерілді. Қалың түтінге қарамастан, ол пәтерге кіріп, іште қалған балаларды тауып, оларды қауіпсіз жерге алып шықты.
Балаларды құтқарғаннан кейін әскери қызметші болған оқиға туралы Төтенше жағдайлар департаментіне хабарлап, көршілерден көмек сұрады. Өрт сөндірушілер келгенге дейін тұрғындар оттың одан әрі таралуына жол бермеу үшін тиісті шаралар қабылдады. Оқиға орнына жеткен ТЖД қызметкерлері өрт ошағын ауыздықтады.
Ұлттық ұлан әскери қызметкерінің жедел әрі батыл әрекетінің арқасында екі бала ажалдан аман қалды.