Ақтаудағы №15 сайлау учаскесіне жас жұбайлар – Бақыт Ақтаев пен Асия Тәжімұратова келді. Сайлауға бір күн қалғанда ерлі-зайыпты ресми түрде некелерін қиды. Дауыс беруге бірге қатысу олар үшін жұбайлар ретінде жасаған алғашқы ортақ азаматтық қадам болды, деп хабарлайды turkystan.kz.
Жас жұбайлардың айтуынша, сайлауға қатысу – саналы азаматтық ұстаным әрі отбасы мен елдің болашағына деген жауапкершіліктің көрінісі. Олардың сөзінше, бүгінде олар отбасылық мәселелерде ғана емес, мемлекеттің одан әрі дамуына қатысты көзқарастарында да бір пікірде. Олар жастарды қолдауды, қоғамдық тұрақтылықты қамтамасыз етуді және жас отбасыларға қолайлы жағдай жасауды басты басымдықтардың бірі санайды.
Бақыт Ақтаев шағын қаржы ұйымын басқарады. Оның пікірінше, жас отбасыларды қолдауда мемлекеттік бағдарламалармен қатар, әлеуметтік жауапкершілікті бизнес те маңызды рөл атқаруы керек. Атап айтқанда, өзі басқаратын компанияда қызметкерлерге некеге тұрған және бала сүйген жағдайда бір реттік қаржылай көмек көрсетіледі.
«Бүгінде экономикалық тұрақтылық жағдайында біздің компания қызметкерлеріне некеге тұрған және бала дүниеге келген кезде бір реттік қаржылай қолдау көрсетеді. Мұндай тәжірибе жалғасын табуы керек деп есептеймін. Өйткені бұл – жас отбасыларға көрсетілетін қосымша қолдаудың бір түрі», – деді Бақыт Ақтаев.
Жаңа депутаттық корпус үшін басым бағыттарға тоқталған Бақыт Ақтаев жас отбасыларды қолдау шараларын одан әрі дамыту қажеттігін атап өтті. Оның айтуынша, бұл бағыттағы негізгі мәселелердің қатарында тұрғын үйдің қолжетімділігі, мектептер мен балабақшалар салу, сондай-ақ білім беру сапасын арттыру бар.
Бақыт Ақтаевтың пікірінше, жас отбасылардың елдің қоғамдық-саяси өміріне белсенді араласуы мемлекеттің болашағын қалыптастыруға тікелей ықпал етеді.
«Жұбайым екеуміздің отбасымыз үлкен, туыстарымыз, немере бауырларымыз көп. Олардың барлығы сайлау учаскелеріне келіп, тұрақты болашақ үшін өз таңдауын жасайды деп ойлаймын», – деді Бақыт Ақтаев.