Қазақстан Халық партиясының төрағасы Нұрсұлтан Шоқанов Алматыға жұмыс сапары барысында шығармашылық зиялы қауым өкілдерімен кездесті, деп хабарлайды turkystan.kz.
Жиын Д. А. Қонаев атындағы Халықаралық қордың ғимаратында өтті. Кездесуге Д. А. Қонаев қорының қоғамдық, мәдени және ағартушылық бастамалар жөніндегі үйлестірушісі Жанна Асқарова, академик А. Х. Марғұлан атындағы қордың басшысы Дәме Марғұлан, Ш. Ш. Уәлиханов атындағы Тарих және этнология институтының Қазақстанның ХХ ғасыр тарихы бөлімінің меңгерушісі, тарих ғылымдарының кандидаты Константин Черепанов, ЮНЕСКО қамқорлығындағы Мәдениеттерді жақындастыру халықаралық орталығының жетекші ғылыми қызметкері Владимир Толмачев, ҚР Журналистика академиясының академигі, журналист Тілеужан Есілбаев, қазақ әдебиетінің классигі Тахауи Ахтановтың ұлы Дулат Ахтанов және басқа да азаматтар қатысты. Іс-шара спикерлерінің бірі – Дінмұхамед Ахметұлы Қонаевтың немере інісі, ағасы Асқардың ұлы Диар Асқарұлы Қонаев болды.
Кездесу барысында Қазақстан Халық партиясының төрағасы зиялы қауым өкілдерінің елдің қоғамдық және мәдени өміріндегі рөліне тоқталды. Нұрсұлтан Шоқановтың айтуынша, зиялы қауым өзгерістерді сырттай бақылаушы емес, елдің болашағын қалыптастыру үдерісіне белсенді қатысушы болуы қажет.
Қазақстан Халық партиясының сайлауалды бағдарламасына тоқталған Нұрсұлтан Шоқанов әлеуметтік әділеттілік, ұлттық мәдениет, сапалы білім және технологиялық даму бағыттарын өзара байланысты қарастыру қажеттігін айтты.
«Қазақстанның басты ресурсы – білімді әрі білікті адамдар», – деді Қазақстан Халық партиясының жетекшісі. Оның айтуынша, мемлекет ғалымдарға, педагогтерге, дәрігерлерге, инженерлерге, мәдениет қайраткерлеріне және қоғам көшбасшыларына арқа сүйеуі тиіс.
Қазақстан Халық партиясы мәдениетті қоғамның құндылықтарын, тарихи жадын және азаматтардың елге деген көзқарасын қалыптастыратын маңызды сала ретінде қарастырады. Осыған байланысты мәдениет саласын дамыту стратегиялық бағыттардың бірі болуы қажет екені айтылды.
Кездесуде Қазақстан Халық партиясының тарихи-мәдени мұраны сақтау мен көпшілікке қолжетімді етуге қатысты ұсыныстары да таныстырылды. Атап айтқанда, тарихи және мәдени ескерткіштерді қалпына келтіру, музей қорларын цифрландыру, тарихи-мәдени нысандарды туристік инфрақұрылымға енгізу және қазақстандық нысандарды ЮНЕСКО тізіміне енгізу жұмыстарын жандандыру мәселелері сөз болды.
Қазақстан Халық партиясының төрағасы зиялы қауыммен формалды емес, тұрақты әрі мазмұнды диалог орнатудың маңыздылығын атап өтті. Оның айтуынша, қоғамның дамуы білімді азаматтардың пікірін ескеруге, мәдени құндылықтарды сақтауға және жаңа ұрпақтың сапалы тәрбие алуына байланысты.
Кездесу барысында Қазақстан Халық партиясының өкілдері мен шығармашылық зиялы қауым мүшелері мәдениет, тарих, білім беру және қоғамдық даму мәселелері бойынша пікір алмасты. Қатысушылар өз ұсыныстары мен ой-пікірлерін ортаға салды. Қазақстан Халық партиясы мұндай кездесулердің қоғамдық пікірді талқылауға және мәдени-гуманитарлық саланың өзекті мәселелерін айқындауға мүмкіндік беретінін атап өтті.