Ұлыбританияда жүрегі кенеттен тоқтап, жасанды комаға түскен ер адамның жағдайы жаңа туған қызымен кездескеннен кейін жақсара бастаған, деп хабарлайды turkystan.kz.
Сэм Кинг есімді азамат әйелі декреттік демалысқа шығар алдындағы соңғы жұмыс күнін атап өткеннен кейін үйінде аяқ астынан жүрек талмасына ұшыраған. Әйелі оның оғаш дыбыс шығарып, көзі жоғары айналғанын байқап, бірден жедел жәрдем шақырған.
Диспетчердің нұсқауымен ол күйеуіне жүрек-өкпе реанимациясын жасаған. Жүктіліктің соңғы айында болғанына қарамастан, әйел шамамен 15 минут бойы жүрекке жанама массаж жасаған.
Оқиға орнына жеткен дәрігерлер Сэмнің өмірін сақтап қалу үшін тағы екі сағат күрескен. Кейін оның жағдайына байланысты жасанды комаға енгізуге тура келген.
Күйеуінің жанында болғысы келген әйел аурухана маңындағы қонақүйге орналасқан. Үш күннен кейін оның толғағы басталып, өзі де сол ауруханаға жеткізілген.
Осы уақытта дәрігерлер Сэмге беріліп жатқан тыныштандырғыш дәрілердің мөлшерін біртіндеп азайта бастаған. Ол көзін ашқанымен, қимылсыз жатқандықтан, мамандар оның ми қызметінің қаншалықты сақталғанын нақты бағалай алмаған.
Алайда жаңа туған қызын әкесінің жанына алып келген кезде күтпеген өзгеріс болған. Сәбиді көрген Сэмнің көзінен жас шыққан. Дәрігерлер мұны оның айналасында болып жатқан жағдайға алғаш рет саналы түрде реакция білдіруі деп бағалаған.
Осы оқиғадан кейін ер адамның жағдайы біртіндеп жақсара бастаған.
Ұзақ уақыт жасалған реанимация салдарынан Сэмнің бірнеше қабырғасы сынған. Кейін оған жүрек ырғағын бақылап, қажет болған жағдайда электр импульсін беретін дефибриллятор орнатылған.
Қазір ер адам ауруханадан шыққан және спортпен қайта айналыса бастаған. Дегенмен дәрігерлер оның жүрегінің не себепті кенет тоқтағанын әлі анықтап жатыр. Сол үшін ол кардиомонитор тағып жүр.