2026 жылғы 23 тамызда Қазақстан Республикасы Құрылтайы депутаттарының сайлауы өтеді. Егер сайлау күні сайлаушы өзінің тіркелген жерінде емес, басқа қалада немесе өңірде болатын болса, заңнама оған нақты орналасқан жері бойынша дауыс беруге мүмкіндік береді.
Ол үшін алдын ала дауыс беру құқығына арналған есептен шығару куәлігін алу қажет.
Есептен шығару куәлігін қайдан және қашан алуға болады?
Есептен шығару куәлігін сайлаушы өзінің тіркелген жері бойынша учаскелік сайлау комиссиясынан алады.
Ол үшін учаскелік комиссияға барып, өтініш жазып, жеке басын куәландыратын құжатты көрсету қажет.
Құрылтай депутаттарының сайлауында есептен шығару куәліктері 2026 жылғы 7 тамыздан бастап 22 тамыз сағат 18:00-ге дейін беріледі.
Егер азаматтың куәлікті өзі алуға мүмкіндігі болмаса, оны белгіленген тәртіппен сенімхат бойынша өкілі алуы мүмкін.
Басқа өңірде есептен шығару куәлігімен қалай дауыс беруге болады?
Мысалы, сайлаушы Астана қаласында тіркелген, бірақ 23 тамыз күні Алматыда, Шымкентте немесе басқа өңірде болатын болса, ол алдын ала тіркелген жеріндегі учаскелік сайлау комиссиясынан есептен шығару куәлігін алады.
Сайлау күні азамат өзінің нақты орналасқан жеріндегі сайлау учаскесіне барып, мына құжаттарды ұсынады:
1. Жеке басын куәландыратын құжат;
2. Есептен шығару куәлігі.
Осы құжаттардың негізінде сайлаушы тиісті учаскедегі сайлаушылар тізіміне енгізіліп, дауыс бере алады.
Сондықтан сайлау күні басқа қалада немесе өңірде болатынын алдын ала білетін азаматтарға есептен шығару куәлігін уақытында алу ұсынылады.
Басқа учаскеде дауыс беру үшін есептен шығару куәлігін алуға бола ма?
Есептен шығару куәлігі сайлаушының дауыс беру күні өзінің тұрақты орналасқан жерінен тыс жерде болуына байланысты беріледі.
Егер азамат тіркелген елді мекенінде болып, сол елді мекеннің басқа учаскесінде дауыс бергісі келсе, бұл үшін есептен шығару куәлігі берілмейді.
Мысалы, сайлаушы Астана қаласында тіркеліп, сайлау күні де Астанада болатын болса, қала ішіндегі басқа сайлау учаскесінде дауыс беру үшін есептен шығару куәлігін ала алмайды.
Нені ескерген жөн?
Есептен шығару куәлігі бір рет беріледі. Куәлік жоғалған жағдайда оның телнұсқасы берілмейді.
Сондықтан құжатты сайлау күніне дейін сақтап, дауыс беруге барғанда оны жеке басын куәландыратын құжатпен бірге алып жүру қажет.
Мұндай тәртіптің басты мақсаты – азаматтың сайлау күні тіркелген жерінде болмаса да, өзінің сайлау құқығын жүзеге асыруына мүмкіндік беру.
Құқықтық негізі: Қазақстан Республикасының «Қазақстан Республикасындағы сайлау туралы» Конституциялық заңының 41-бабының 6-1-тармағы, сондай-ақ дауыс беру құқығына арналған есептен шығару куәліктерін беру және есепке алу қағида-лары.
Ең бастысы – куәлікті алуды кейінге қалдырмаңыз: ол 22 тамыз сағат 18:00-ге дейін беріледі.
Сайлауға қатысты қосымша ақпаратты учаскелік сайлау комиссияларынан және Қазақстан Республикасы Орталық сайлау комиссиясының ресми интернет-ресурсынан алуға болады.
Елорда тұрғындары өздерінің сайлау учаскесін онлайн біле алады, – деп хабарлайды қала әкімдігінің ресми сайты.
Сайлау учаскесі туралы мәліметті нақты уақыт режимінде мына тәсілдер арқылы білуге болады:
1. Ресми веб-сервис арқылы: https://sailau.astana.kz/
2. Telegram чат-боты арқылы: https://t.me/sailau_astana_bot
3. iKomek бірыңғай байланыс орталығының 109 нөмірі арқылы.
Азаматты белгілі бір сайлау учаскесі бойынша сайлаушылар тізіміне енгізудің негізі оның сол сайлау учаскесінің аумағындағы тұрғылықты жері бойынша тіркелуі болып саналады.