Күнделікті өмірде лифтінің орнына баспалдақпен жүру жүрек-қан тамырлары ауруларынан болатын өлім қаупінің төмен болуымен байланысты. Ұлыбритания ғалымдары жүргізген ауқымды талдау баспалдақпен тұрақты көтерілетін адамдарда жүрек-қан тамырлары ауруларынан қайтыс болу қаупі баспалдақты пайдаланбайтындарға қарағанда 39 пайызға төмен болғанын көрсетті, деп хабарлайды turkystan.kz.
Зерттеуді Шығыс Англия университеті мен Norfolk and Norwich University Hospital мамандары жүргізген. Ғалымдар баспалдақпен жүру мен денсаулық арасындағы байланысты қарастырған тоғыз зерттеудің нәтижесін біріктіріп, жалпы 480 479 адамның дерегін талдаған. Қатысушылардың жасы 35 пен 84 аралығында болған. Олардың арасында дені сау адамдар да, бұрын инфаркт немесе қан тамыры ауруларын өткергендер де болған.
Нәтижесінде баспалдақпен көтерілетін адамдарда кез келген себептен мезгілсіз қайтыс болу қаупі 24 пайызға төмен болған. Сонымен қатар олардың арасында инфаркт, инсульт және жүрек жеткіліксіздігі сияқты жүрек-қан тамырлары аурулары да сирегірек кездескен.
Зерттеудің ерекшелігі, ғалымдар баспалдақтың нақты қанша қабат болғанына немесе адамдардың қандай жылдамдықпен көтерілгеніне шектеу қоймаған. Яғни талдау күнделікті өмірдегі қарапайым баспалдақпен жүру әдетіне қатысты.
Зерттеу авторларының айтуынша, мұндай физикалық белсенділіктің артықшылығы – оған арнайы уақыт бөлудің қажеті жоқ. Баспалдақпен үйде, жұмыста, сауда орталығында немесе басқа ғимараттарда көтерілуге болады.
«Егер баспалдақ пен лифтінің бірін таңдау мүмкіндігі болса, баспалдақты таңдаңыз. Бұл жүрегіңізге пайдалы», – дейді зерттеу авторы Софи Пэддок. Оның айтуынша, қысқа уақытқа созылатын физикалық белсенділіктің өзі денсаулыққа пайдалы болуы мүмкін.
Дегенмен зерттеу баспалдақпен жүру өлім қаупін дәл 39 пайызға азайтады деп дәлелдемейді. Бұл жүйелі шолу мен метаталдау болғандықтан, ол баспалдақпен жүру мен денсаулық көрсеткіштері арасындағы байланысты анықтайды. Баспалдақты жиі таңдайтын адамдардың өмір салты жалпы белсендірек болуы сияқты басқа факторлар да нәтижеге ықпал етуі мүмкін.
Соған қарамастан зерттеушілер баспалдақпен жүруді күнделікті физикалық белсенділікті арттырудың ең қарапайым әрі қолжетімді тәсілдерінің бірі деп санайды. Әсіресе спортзалға баруға уақыты немесе мүмкіндігі жоқ адамдар үшін лифтінің орнына баспалдақты таңдау қозғалысты күн тәртібіне қосудың оңай жолы болуы мүмкін.