Алматыда «Ауыл» партиясының Құрылтайы депутаттығына кандидаттары сайлауалды науқаны аясында агроөнеркәсіптік кешен саласындағы ғалымдар және мамандармен кездесті, деп хабарлайды turkystan.kz.
Кездесудің маңызды бөлігі ретінде көрнекті ғалым, «Ауыл» партиясының негізін қалаушылардың бірі Ғани Қалиевтің ескерткішіне тағзым ету рәсімі өтті.
Жиын барысында «Ауыл» партиясының өкілдері аграрлық ғылымды дамыту, селекция мен тұқым шаруашылығын жетілдіру, ғылыми әзірлемелерді өндіріске енгізу, қолданбалы зерттеулерді қаржыландыру және жас кадрларды даярлау мәселелерін талқылады.
«Ауыл» партиясының төрағасы Қайрат Айтуғанов азық-түлік қауіпсіздігі мен технологиялық тәуелсіздіктің негізі отандық ғылым мен өндірісте екенін атап өтті. Оның айтуынша, ғылыми идеядан бастап оны нақты өндіріске енгізуге дейінгі толыққанды жүйені қалыптастыру маңызды.
Кездесуде «Ауыл» партиясының агроөнеркәсіптік кешенді дамытуға қатысты сайлауалды бағдарламасының бағыттары да сөз болды. Атап айтқанда, аграрлық ғылымды қаржыландыру, тәжірибелік зерттеулерді дамыту, селекциялық әлеуетті күшейту және ғылыми әзірлемелерді ауыл шаруашылығы өндірісіне енгізу мәселелеріне назар аударылды.
Ғалымдар мен АӨК мамандары «Ауыл» партиясының өкілдеріне саланың өзекті мәселелеріне қатысты ұсыныстарын жеткізді. Қайрат Айтуғанов мамандардың пікірлері мен ұсыныстары «Ауыл» партиясының сайлауалды бағдарламасын нақтылау кезінде және алдағы жұмыста ескерілетінін айтты.
«Ауыл» партиясы үшін аграрлық ғылымды дамыту мен ғылыми кадрлардың әлеуетін тиімді пайдалану мәселелері ауыл шаруашылығы саласының ұзақ мерзімді дамуының маңызды бағыттарының бірі ретінде қарастырылады.
Кездесу соңында «Ауыл» партиясының төрағасы азық-түлік тәуелсіздігі отандық ғылымның дамуымен тікелей байланысты екенін атап өтті.
«Азық-түлік тәуелсіздігі өз ғылымымыздан басталады. Ал технологиялық тәуелсіздік — өз білімімізді өз өндірісімізге айналдыра алу қабілетінен басталады», — деді «Ауыл» партиясының төрағасы Қайрат Айтуғанов.