Батыс Қазақстан облысында өзін электр желілік компаниясының қызметкері ретінде таныстырған алаяқтардың арбауына түскен әйел ірі көлемдегі ақшалай қаражатынан айырылды. Полиция тұрғындарды мұндай қоңырауларға сақ болуға шақырады, деп хабарлайды turkystan.kz.
Батыс Қазақстан облысының полиция департаменті тұрғындарды электрмен жабдықтаушы ұйымдардың қызметкерлері ретінде хабарласып, алаяқтық жасайтын қылмыскерлердің жаңа айла-тәсілі туралы ескертеді.
"Батыс Қазақстан аймақтық электр желілік компаниясы" ЖШС мәліметінше, соңғы уақытта өзін компания қызметкері ретінде таныстырып, электр энергиясын есепке алу құралын ауыстыру, тексеру немесе салыстырып тексеру қажет екенін айтып қоңырау шалатын алаяқтық деректері жиілеген. Олар азаматтардан ұялы телефонға келген SMS-хабарламадағы растау кодын, жеке мәліметтерін немесе банк картасының деректерін сұрайды.
Осындай алаяқтықтың құрбаны 20 шілде күні Батыс Қазақстан облысының тұрғыны болды. Белгісіз адам өзін электр желілеріне қызмет көрсететін ұйымның қызметкері ретінде таныстырып, электр есептегішін тексеруге өтінім рәсімдеу үшін ұялы телефонға келген SMS-кодты сұраған. Әйел оның сөзіне сеніп, растау кодын айтып берген.
Біраз уақыттан кейін оған қайта хабарласқан алаяқтар бұрын берілген код үшінші тұлғалардың қолына түскенін және оның атына несие рәсімделіп жатқанын айтқан. Олар ақшаны "сақтап қалу" сылтауымен әйелді өз атына несие рәсімдеуге, кейін алынған қаражатты "қауіпсіз шотқа" аударуға көндірген. Соның салдарынан жәбірленуші ірі көлемдегі қаржысынан айырылды.
Осыған байланысты полиция азаматтарға келесі қауіпсіздік талаптарын қатаң сақтауды ұсынады: SMS арқылы келген растау кодтарын ешкімге айтпаңыз;
- жеке деректеріңізді, банк карталарының реквизиттері мен қауіпсіздік кодтарын бөгде адамдарға бермеңіз;
- күмәнді қоңырау шалынған жағдайда әңгімені дереу тоқтатып, ұйымның ресми байланыс нөміріне өзіңіз хабарласыңыз;
- электр қуатын өшіру, айыппұл салу немесе қандай да бір әрекетті шұғыл орындауды талап еткен қорқыту сөздеріне сенбеңіз;
- "қауіпсіз" немесе "қорғалған" шоттарға ақша аудару туралы ұсыныстардың барлығы алаяқтардың айласы екенін есте сақтаңыз.
Өз кезегінде "Батыс Қазақстан аймақтық электр желілік компаниясы" ЖШС көппәтерлі тұрғын үйлерде электр есептегіштерін телефон арқылы келісу негізінде ауыстырмайтынын, SMS арқылы келген растау кодтарын ешқашан сұрамайтынын және телефон қоңыраулары немесе мессенджерлер арқылы есептегіш ауыстыруға кезек қалыптастырмайтынын мәлімдеді.
Компания өкілдерінің айтуынша, есепке алу құралдарын орнату, ауыстыру және техникалық қызмет көрсету жұмыстары тек ресми хабарламалар негізінде және қолданыстағы заңнама талаптарына сәйкес жүргізіледі.
Электр есептегіштеріне қатысты сұрақтар туындаған жағдайда тұрғындар "Батыс Қазақстан аймақтық электр желілік компаниясы" ЖШС-нің Электр энергиясын бақылау және есепке алу департаментіне 54-50-86 немесе 54-48-11 телефондары арқылы хабарласа алады.
Полиция азаматтарға электрмен жабдықтаушы ұйымдардың, банктердің, құқық қорғау органдарының және мемлекеттік мекемелердің қызметкерлері ешқашан телефон арқылы SMS-кодтарды айтуды, несие рәсімдеуді немесе қаражатты "қауіпсіз шоттарға" аударуды талап етпейтінін еске салады.
Тәртіп сақшылары тұрғындарды қырағы болуға және бұл алаяқтық тәсілі туралы жақындарына, әсіресе егде жастағы адамдарға ескертуге шақырады. Қарапайым сақтық пен ақпараттандырылғандық көптеген интернет және телефон алаяқтығының алдын алуға мүмкіндік береді.