Жалпыұлттық социал-демократиялық партиясынан (ЖСДП) Құрылтай депутаттығына кандидаттар Нұрлан Жабаев, Раушан Әубәкірова және Наурыз Сайлаубай №4 қалалық емханада болды. Сайлауалды үгіт-насихат науқаны аясында өткен бұл шарада үміткерлер дәрігерлермен, орта және кіші медициналық қызметкерлермен жүздесіп, еркін пікір алмасты, деп хабарлайды turkystan.kz.
Партия өкілдері мекеменің материалдық-техникалық базасымен танысып, алғашқы буын мамандарының еңбек жағдайын бағалады. Сондай-ақ медицина қызметкерлерін әлеуметтік қолдау, зейнет жасын төмендету және денсаулық сақтау жүйесін реформалауға бағытталған «Прогреске бастар 20 белес» сайлауалды бағдарламасының негізгі басымдықтарымен таныстырды. Депутаттыққа кандидат Наурыз Сайлаубай адал еңбекті қорғау мен әлеуметтік әділдікті орнату мәселелеріне ерекше тоқталды.
«ЖСДП өзінің сайлауалды бағдарламасы аясында зейнетақы жүйесін түбегейлі реформалауды ұсынады. Біз әйелдердің зейнет жасын – 58 жасқа, ал ерлердікін – 60 жасқа дейін төмендетуді талап етеміз. Ондаған жылдар бойы адам емдеу, бала оқыту немесе өндірістің ауыр салаларында еңбек ету – орасан зор психологиялық және физикалық жүктеме әкеледі. Бұл ретте әйел заты қос жауапкершілікті қатар арқалап, үйде де, түзде де еңбек ететінін ескерсек, бұл шара – өмірдің өзінен туындап отырған қажеттілік. Сонымен қатар біз кіші медициналық қызметкерлер мен жас мамандардың базалық лауазымдық жалақысын кезең-кезеңімен 25%-ға арттыруға қол жеткіземіз. Ал қалалық медицина қызметкерлері үшін бастапқы жарнасы 10%, жылдық мөлшерлемесі 5–7%-дан аспайтын жеңілдетілген ипотека бағдарламасын іске қосуды ұсынып отырмыз. Реформамыздың басты мақсаты – дәрігерлерді бюрократия қамытынан босату. Қазіргі МӘМС (Медициналық сақтандыру) жүйесі қағазбастылықты шектен тыс көбейтіп жіберді. Дәрігер бітпейтін есептерді толтырумен емес, тікелей пациентті емдеумен айналысуы тиіс», – деп атап өтті Н. Сайлаубай.
Депутаттыққа кандидат Нұрлан Жабаев дәрігерлерге мемлекеттік кепілдіктер беру және емдеу мекемелерін техникалық тұрғыдан жаңғырту қажеттігін алға тартты.
«Дәрігер мен мейірбикенің еңбегі өлшеусіз қажыр-қайратты талап етеді. Біздің партия мемлекет медицина қызметкерлері мен олардың отбасы мүшелерін міндетті әлеуметтік және медициналық сақтандырумен қамтамасыз етуге міндетті деп есептейді. Сонымен қатар біз ауруханалар мен емханалардағы құрал-жабдықтарды кемі 40%-ға жаңартуды талап етеміз. Бұл сапалы медициналық тексеру мен дәл диагностика жасауға жол ашады. Қазіргі таңда біздің сайлауалды штабымыз Мұхамедханов көшесі, 9-үй мекенжайында жұмыс істеп тұр. Яғни, әрбір медицина қызметкері өз мәселесін тікелей жеткізе алады. Үміткерлеріміз барлық өтініштерді қабылдап, оларды заңнамалық деңгейде шешу үшін тиісті жұмыстар жүргізетін болады», – деп сендірді кандидат.
Депутаттыққа кандидат Раушан Әубәкірова алғашқы медициналық-санитарлық көмекті (АМСК) нығайту мәселесіне тоқталды.
«Алғашқы медициналық-санитарлық көмек – бүкіл ұлт саулығының негізі. Емханалар базалық диагностика мамандарының тапшылығы жағдайында жұмыс істемеуі керек, сондай-ақ ТМККК (Тегін медициналық көмектің кепілдік берілген көлемі) пакетіндегі дәрі-дәрмектер де жеткілікті болуы шарт. Біздің мақсатымыз – әрбір азаматтың білікті медициналық көмек пен қажетті препараттарды тегін, айлап созылатын кезексіз, жылдам алуына жағдай жасау», – деді ол.
Ұжым мен дәрігерлер қауымдастығы атынан хирург, дерматовенеролог дәрігер Бақыт Қасенова сөз алды.
«Тәжірибелі дәрігер ретінде мен бұл мәселелерді күнделікті көріп жүрмін. Жұмысымызды жеңілдетуі тиіс жасалған цифрландыру үдерісі, керісінше, қос есе жүктемеге айналды. Бір маманға күніне 50-ге жуық ауру тарихын толтыру жүктелгенде, пациентке шынайы жанашырлық таныту туралы айтудың өзі қиын – дәрігерде уақыт қалмайды. ЖСДП өзін нақты істердің партиясы ретінде дәлелдеді. Бұған дейін партиямен бірлесіп жұмыс істеудің және дөңгелек үстелдер өткізудің арқасында біз дәріханалар үшін шығыны көп әрі өзекті емес GPP стандарттары бойынша талаптардың күшін жоюға қол жеткіздік. Біз ЖСДП кандидаттарының бюрократиялық қысымды азайту, жүктемені қайта қарау (тіпті 4 күндік жұмыс аптасын талқылауға дейін) және медицина қызметкерлерін әлеуметтік қорғауды күшейту жөніндегі бастамаларын толық қолдаймыз. Құрылтайға Денсаулық сақтау министрлігінің қатысуымен, тәжірибелі дәрігерлердің пікіріне сүйенетін жұмыс топтары қажет», – деп атап өтті ол.
Медицина қызметкерлері көтерген барлық мәселелер мен ұсыныстар ЖСДП сайлауалды штабының сайлаушылар аманаты тізіліміне ресми түрде енгізілді. Партия өкілдері кездесуге қатысушыларды белсенді азаматтық позиция танытып, ЖСДП-ны (сайлау бюллетеніндегі №2) қолдауға шақырды.