Сайлауалды үгіт-насихат науқаны аясында «Ақ жол» демократиялық партиясы Ақтөбеде жас кәсіпкерлерді, банк секторының, IT саласының, даму институттарының өкілдерін, студенттер мен бизнес қауымдастығын бір алаңға тоғыстырған бизнес-стартаптар форумын өткізді, деп хабарлайды turkystan.kz.
Шараға қатысушылар жас кәсіпкерлердің стартап-жобалары көрмесін тамашалап, өз бастамаларын таныстырып, инновациялық бизнесті дамыту мәселелері бойынша тәжірибе алмасты.
«Ақ жол» демократиялық партиясының төрағасы Дания Еспаева форум қатысушылары алдында сөз сөйлеп, партияның шағын және орта бизнесті қолдауға, отандық өндірісті дамытуға, жаңа жұмыс орындарын ашуға және кәсіпкерлікке қолайлы орта қалыптастыруға бағытталған "Ақ жол" партиясының сайлауалды бағдарламасының негізгі басымдықтарын таныстырды. Әсіресе, жастар бастамаларын қолдау мен кәсіпкерлік белсенділікті арттыру мәселелеріне ерекше назар аударылды.
Кездесу барысында қатысушылар стартаптарды қаржыландыру, инновациялық бизнесті дамыту, даму институттарымен өзара әрекеттестік пен жеке кәсіп ашуға қолайлы жағдай жасау мәселелерін талқылады. Жас кәсіпкерлер партия өкілдерімен, банк қауымдастығының мамандарымен және сарапшылармен пікір алмасып, жастар кәсіпкерлігін дамытуға қатысты өз ұсыныстарын ортаға салды.
Форум қорытындысы бойынша қатысушылар жастардың кәсіпкерлікке деген қызығушылығының жоғары екенін атап, жас азаматтардың өз жобаларын жүзеге асырып, ел экономикасының дамуына үлес қосуына мүмкіндік беретін қолайлы жағдай қалыптастыру үшін мемлекет, бизнес және қоғамның күш-жігерін біріктірудің маңыздылығына тоқталды.