Apple компаниясы iPhone, iPad, Mac және Apple Watch құрылғыларын ай сайынғы төлеммен пайдалануға мүмкіндік беретін жаңа бағдарламаны іске қосуға дайындалып жатыр. Apple Upgrade деп аталатын қызмет 28 шілдеде АҚШ-та басталуы мүмкін, деп хабарлайды turkystan.kz.
Bloomberg дереккөздерінің мәліметінше, бағдарламаның қаржылық серіктесі Klarna болады. Жаңа қызмет алдымен АҚШ-тағы Apple дүкендері мен компанияның интернет-дүкенінде ұсынылады. Apple мен Klarna бұл ақпаратқа қатысты әзірге ресми түсініктеме берген жоқ.
Жаңа бағдарлама қарапайым бөліп төлеуден жалға алу тәртібіне көбірек ұқсайды. Тұтынушы құрылғының толық құнын бірден төлемей, оны белгіленген мерзім бойы ай сайынғы төлеммен пайдаланады.
iPhone мен Apple Watch үшін келісім мерзімі 24 ай, ал iPad пен Mac компьютерлері үшін 36 ай болады деп жоспарланған. Бағдарламаға қосылу кезінде Klarna өтініш берушінің несие тарихына жеңіл тексеру жүргізеді.
Келісім мерзімі аяқталған кезде пайдаланушыға бірнеше таңдау беріледі. Ол құрылғыны қайтарып, жаңасына ауыстыра алады немесе қалған сомасын төлеп, өзінде қалдырады. Кей жағдайда келісім аяқталмай тұрып-ақ жаңа үлгіге ауысуға мүмкіндік берілуі мүмкін. Алайда мерзімінен бұрын ауыстыру, сатып алу немесе қайтару кезінде қосымша ақы алынуы ықтимал.
Бағдарлама Apple өнімдерінің бәрін қамтымайды. Алдын ала мәлімет бойынша, iPhone 16, Apple Watch SE, бастапқы үлгідегі iPad және MacBook Neo қызметке қосылмайды. Сондай-ақ бағдарлама білім беру мекемелері мен бизнеске арналған сатып алуларға қолданылмайды.
Apple Upgrade компанияның қазіргі iPhone Upgrade Program қызметінен де ерекшеленеді. Бұрынғы бағдарламада құрылғының ай сайынғы төлеміне AppleCare сақтандыруы кіретін. Жаңа жалға алу жүйесінде AppleCare бөлек рәсімделеді деп күтілуде. Бұрын жасалған келісімдер күшінде қалғанымен, жаңа клиенттерді ескі бағдарламаға қабылдау тоқтатылуы мүмкін.
Қазіргі уақытта Apple АҚШ-та өнімдерді Apple Card арқылы пайызсыз бөліп төлеуге және байланыс операторларының қаржыландыру бағдарламаларын пайдалануға мүмкіндік береді. Компанияның ресми сайтында Klarna мен Affirm қызметтері Apple Pay арқылы кейбір сатып алуларды кейін төлеу тәсілі ретінде көрсетілген. Бірақ бұл ұсыныстарда құрылғы сатып алушының меншігіне өтеді, ал жаңа бағдарлама жалға беру тәртібімен жұмыс істемек.
Жалға алу тәсілі жаңа құрылғыларды жиі ауыстыратын пайдаланушылар үшін тиімді болуы мүмкін. Олар қымбат техниканың толық құнын бірден төлемей, белгілі бір уақыттан кейін жаңа үлгіге өте алады. Сонымен қатар ай сайынғы төлем қазіргі қаржыландыру бағдарламаларына қарағанда төмен болуы мүмкін.
Алайда төмен айлық төлем құрылғының арзанға түсетінін білдірмейді. Тұтынушы келісім мерзіміндегі жалпы төлемді, құрылғыны сатып алу құнын, сақтандыруды және ықтимал қосымша алымдарды алдын ала салыстыруы қажет. Құрылғы жалға берілген кезде оның бүлінуі немесе жоғалуы да бөлек қаржылық міндеттемелерге әкелуі мүмкін.
Әзірге Apple Upgrade бағдарламасының АҚШ-тан тыс елдерде қашан іске қосылатыны белгісіз. Klarna көптеген мемлекетте жұмыс істейтіндіктен, қызмет кейін басқа нарықтарға таралуы ықтимал. Дегенмен Қазақстанда іске қосылатыны туралы ресми ақпарат жарияланған жоқ.
Жоспар өзгермесе, Apple жаңа бағдарламаны 28 шілдеде таныстырады. Сол кезде ай сайынғы төлем мөлшері, құрылғыны қайтару талаптары және қосымша алымдар туралы толық мәлімет белгілі болады.