Кейде адамның белгілі бір сөзді немесе есімді білсе де, оны сол сәтте есіне түсіре алмауы жадтың нашарлауынан емес, мидағы ақпаратқа қолжетімділіктің уақытша төмендеуінен болуы мүмкін. Бұл туралы РИА Новости агенттігіне Нагоя қалалық университетінің профессоры Хироси Номура мәлімдеді, деп хабарлайды turkystan.kz.
Ғалымның айтуынша, егер адам кейінірек әлгі сөзді өздігінен немесе қандай да бір ишараның көмегімен есіне түсірсе, онда ақпарат жадтан өшпеген, тек оған қол жеткізу уақытша қиындаған.
Профессор Номура бастаған зерттеу тобы Хоккайдо және Кумамото университеттерінің ғалымдарымен бірлесіп, мидағы гистаминдік нейрондардың есте сақталған ақпаратты еске түсірудегі рөлін зерттеген.
Тәжірибе барысында тышқандар белгілі бір дыбысты қант ерітіндісімен байланыстыруға үйретілген. Кейін таныс дыбыс естілгенде олар сыйақы күтетінін білдіретін әрекеттер жасаған. Зерттеу нәтижесінде гистаминдік нейрондардың белсенділігі жоғары болған сәтте есте сақтау қабілетіне байланысты әрекеттер шамамен 40%-ға жиірек байқалған.
Ғалымның пікірінше, «тіл ұшында тұр, бірақ есіме түспей жатыр» деген құбылыс осы механизммен түсіндірілуі мүмкін. Дегенмен ол зерттеу адамның есімдерді еске түсіру ерекшелігін тікелей қарастырмағанын атап өтті.
Маман әзірге бұл тұжырымды адамдарға толықтай қолдануға болмайтынын айтады. Оның сөзінше, адамның жадқа қол жеткізу механизмін толық түсіну үшін ми белсенділігін бейнелеу, электроэнцефалография (ЭЭГ) және фармакологиялық зерттеулерді қамтитын қосымша ғылыми жұмыстар қажет.