Балқашта жазғы маусымның басты оқиғаларының бірі Balkhash Tour Fest-2026 фестивалі басталды. Екі күнге созылатын ауқымды шараға еліміздің түкпір-түкпірінен және шетелден мыңдаған қонақ келді, деп хабарлайды turkystan.kz.
Фестиваль бағдарламасы спорттық жарыстарға, концерттерге, гастрономиялық рекордтарға және бүкіл отбасыға арналған ойын-сауық іс-шараларына толы. Биылғы фестивальдің басты жаңалығы – алғаш рет Балқаш көлінің үстінде жүздеген дрон қатысатын жарық шоуының ұйымдастырылуы. Кешкі уақытта аспанды жарқыраған дрондар көмкеріп, көрермендерге ерекше әсер сыйлайды.
Белсенді демалысты ұнататындар үшін ондаған спорттық және ойын алаңдары әзірленген. Солардың бірі – алып дженга сайысы. Қатысушылар көл жағасында ең биік мұнара тұрғызудан жарысады.
Сонымен қатар фестиваль қонақтарын ярко-кросс, мас-рестлинг, Сергей Цырульниковтың интерактивті күш көрсету бағдарламасы, ашық суда жаппай жүзу жарысы, жағажай волейболы және басқа да көптеген спорттық шаралар күтеді.
Заманауи технологиялар да фестивальдің маңызды бөлігіне айналған. Арнайы жасанды интеллект аймағында келушілер робот-қақпашымен ойнап, өз шеберліктерін сынай алады.
Гастрономиялық бағдарлама аясында ұйымдастырушылар ең үлкен қазыбургер дайындап, Қазақстан рекордын жаңартуға талпыныс жасайды. Бұдан бөлек, фестиваль аумағында фудкорттар, қолөнершілер жәрмеңкесі, ашық аспан астындағы кинотеатр, отбасылық демалыс аймақтары, шығармашылық алаңдар және көбік кештері жұмыс істейді.
Фестиваль сахнасында қазақстандық танымал орындаушылар Miras Zhugunussov, AYAU, Bellucci, Domino, Нұрлан мен Мұрат және Qazaq Band өнер көрсетеді.
Балалар үшін аниматорлардың қатысуымен арнайы ойын-сауық бағдарламасы ұйымдастырылған. Сондай-ақ кішкентай қонақтар «Маша мен Аю» мультфильмінің кейіпкерлерімен кездеседі.
Қала тұрғындары мен туристердің қолайлығы үшін фестиваль күндері Жастар гүлзарынан Tour Fest аумағына дейін тегін автобустар қатынайды. Қоғамдық көлік сағат 10:00-ден 23:00-ге дейін жүреді.