Майы мен қанты көп тағамдарды бала кезде жиі жеу мидың тәбетті реттейтін жүйесіне ұзақ мерзімге әсер етуі мүмкін. Ғалымдардың мәліметінше, мұндай өзгерістер адам кейін дұрыс тамақтануға көшіп, салмағын қалыпқа келтіргеннің өзінде сақталуы ықтимал, деп хабарлайды turkystan.kz.
Зерттеу нәтижелері Nature Communications журналында жарияланды. Ғалымдар фастфуд пен жоғары калориялы тағамдардың ерте жастан тұрақты тұтынылуы мидың тәбетті бақылауға жауап беретін бөліктерінің жұмысын қайта «бағдарлайтынын» анықтаған.
Қазіргі таңда балалардың рационында жоғары деңгейде өңделген өнімдер көп кездеседі. Тәттілер мен майлы тағамдар мерекелерде, мектеп шараларында және марапат ретінде жиі ұсынылады. Мұндай әдеттер ерте жастан қалыптасып, кейін өзгерту қиын болатын тағамдық талғамдарға айналуы мүмкін.
Зерттеушілер мәселенің шешімін ішек микробиомынан іздеген. Нәтижесінде пайдалы бактериялардың белгілі бір түрлері мен пребиотикалық талшықтар мидағы кейбір жағымсыз өзгерістерді ішінара түзетуге және дұрыс тамақтану әдеттерін қалпына келтіруге көмектесетіні байқалған.
Әсіресе сарымсақта, пиязда және бананда табиғи түрде кездесетін пребиотиктер мен пайдалы бактериялар оң әсер көрсеткен. Ғалымдардың пікірінше, ішек микрофлорасын қолдау баланың тәбетін дұрыс реттеуге және дұрыс емес тамақтанудан туындайтын ұзақ мерзімді қауіптерді азайтуға көмектесуі мүмкін.
Дегенмен, зерттеу нәтижелері балалық шақтағы дұрыс тамақтанудың маңызын тағы бір рет көрсетеді: ерте қалыптасқан тағамдық әдеттер денсаулыққа ересек өмірде де әсер етуі мүмкін.